Alberto Reina compareció esti llunes na sala de prensa d'El Requexón con un mensaxe claro: confianza, ambición y máxima concentración en lo que vien. Tres la importante victoria llograda'l pasáu fin de selmana ante'l Girona FC, el centrucampista azul destacó'l bon momentu anímicu del vestiariu y la necesidá de caltener esa llinia nuna selmana que vuelve ser decisiva.
“L'equipu ta mui bien”, señaló Reina. “Entamamos una nueva selmana con munches ganes y cola vista puesta nel partíu ante'l Rayo. Oxalá podamos enganchar una dinámica positiva y dar continuidá a lo que entamamos”.
Sobre'l próximu compromisu lligueru, el futbolista foi contundente. El duelu ante'l conxuntu vallecano preséntase como una auténtica final na llucha pol oxetivu. “Nun tenemos marxe. Ye un partíu clave y tenemos que dir ellí con tolo que tenemos. Ellos tendrán les sos circunstancies, pero nós tenemos que centramos nel nuesu trabayu, en lo que tamos faciendo bien y en siguir puliendo pequeños detalles pa sumar de tres”.
Al analizar el trunfu frente al Girona, Reina valoró'l rindimientu del equipu en dambes árees y l'impactu de los cambios. “En ataque xeneramos delles ocasiones clares y supimos aprovechar una. Defensivamente, na primer parte sufrimos daqué más cola presión alta, pero'l trabayu colectivu foi mui bonu. Amás, los cambios aportaron esi plus que necesitábemos”.
A nivel personal, el centrucampista amosóse satisfechu cola so continuidá nel once. “Lo que más nos presta a los futbolistes ye tar nel céspede. Tólo disfrutando y tentando ayudar al equipu en tolo que pueo”.
Preguntáu pola permanencia, Reina refugó facer cálculos y apostó pol partíu a partíu. “Nun soi de facer cuentes. Tolos alcuentros son decisivos porque sumamos pocos puntos y nun hai marxe d'error. Agora mesmu namái esiste'l Rayo. Dende dientro creemos, y les sensaciones tamién son bones dende fuera. Tuvimos cerca munches veces y por fin llegó la victoria que necesitábemos. Agora toca repitilu toles veces que podamos”.
El xugador azul tamién quiso destacar el sofitu constante de la afición oviedista. “Ye espectacular. Tantu fuera de casa como nel Tartiere, la xente nun falla y empúxanos inclusive nuna situación complicada. Esi sofitu nótase muncho”.
Por último, Reina tuvo pallabres d'eloxu pa Santi Cazorla. “Hai una competencia mui sana. Santi ye un exemplu, entren a un nivel altísimu y vivió absolutamente tolo nel fútbol. Tenerlu cerca y cuntar col so sofitu ye un lluxu. Oxalá podamos coincidir más tiempu xuntos sobre'l céspede”.