El porteru del Real Oviedo, Aarón Escandell, compareció na previa del alcuentru d'esti domingu ante'l Sevilla CF, analizando'l momentu del equipu y la importancia del choque.

 

“El equipu trabayó bien a lo llargo de la selmana, con dellos díes pa preparar el partíu. Dempués del alcuentru ante'l Levante UD, nel que nun supimos competir, yera necesario axustar detalles. Incidimos neso y esperamos que se vea reflexáu esti domingu”.

 

Sobre'l rival, el guardameta azul señaló que “enfrentaremos a un Sevilla diferente al de la primer vuelta. Van venir coles idees clares, ensin complicase y siendo un equipu sólidu. Intentarán facenos dañu per fuera, con centros lateriales, pero nós tenemos que centramos nel nuesu xuegu y en camudar la imaxe que dimos en Levante”.

 

Escandell tamién reconoció les ganes de resarcise del partíu de la primer vuelta nel Sánchez Pizjuán: “Tenemos ganes de revancha, especialmente a nivel individual. Encaxar cuatro goles nun ye fácil y fui pa casa tocáu. Sabemos que la afición tamién tien ganes de que llegue'l domingu pa disfrutar d'una alegría”.

 

En cuanto a la situación clasificatoria, foi claru: “Equí toos tenemos que creer. El que nun lo faiga, meyor que dé un pasu al llau. Hai que caltener la fe hasta que les matemátiques digan lo contrario. Tenemos una gran oportunidá: si conseguimos ganar al Sevilla, podríemos ponenos a cinco puntos, con munchos partíos entá por disputase”.

 

“El equipu ye consciente de que la zona baxa ta bien apretada, con bien poca diferencia de puntos. Tamos centraos en ganar el domingu y lluchar hasta'l final pola permanencia”, añadió.

 

A nivel personal, el porteru oviedista aseguró tar centrao nel presente: “Nun toi pensando nel futuru. Na mio cabeza nun entra otra cosa que'l día a día y siguir disfrutando, dientro de la situación complicada que vivimos. Tengo contratu equí, toi feliz y el mio oxetivu ye salvar al Oviedo; dempués yá se verá”.

 

Por último, Escandell quiso destacar el papel de la afición: “Siempre lo he dichu. Recuerdo l'eventu de Movistar sobre l'ascensu y emocionéme muncho al ver a la xente. Son una parte fundamental. El Oviedo ye quien ye pola so afición; en munches ocasiones dimos más gracies a ellos. Necesitamos esi plus pa siguir remando na mesma direición, anque dempués el destín seya'l que tea que ser”, sentenciaba.