El Real Oviedo afronta una de les selmanes más especiales del so centenariu con una completa programación d'actos que convertirán estos díes nun puntu culminante de la hestoria azul. De llunes a sábadu, el Club, la so Fundación y la ciudá d'Uviéu van ser escenariu d'iniciatives que combinen deporte, cultura, arte y compromisu social.
La selmana entama esti llunes 23 de marzu con una xornada cargada d'actividá. Per un llau, la Universidá d'Uviéu acueye la esposición “Lángara, el Señor de los goles”, un homenaxe a una de les mayores lleyendes del oviedismu al traviés d'una coleición única d'oxetos, semeyes y recuerdos. Ese mesmu día, el centenariu tamién se proyecta a toa España col sorteu del cupón conmemorativu de la ONCE, una iniciativa que xune la hestoria del Club col compromisu social. Amás, el Estadiu Carlos Tartiere lluz yá'l mural del centenariu, una gran obra artística que se convirtió en símbolu visual del sentimientu oviedista.
El miércoles 25, el centenariu adquiere una dimensión internacional con un viaxe institucional a la Ciudá del Vaticanu. La espedición, impulsada pola Fundación Real Oviedo, participará nuna audiencia col Santu Padre. Nella van tar presentes capitanes y entrenadores del primer equipu masculín y femenín, asina como del Vetusta y del Real Oviedo Genuine, nuna representación que pon en valor la dimensión social y humana del Club.
El xueves 26 de marzu, día nel que se cumplen los 100 años d'hestoria de la entidá azul, la ciudá acoyerá dellos actos destacaos. Uviéu va ser sede del Congresu de Medicina y Deporte, el XIV Congresu Internacional en Ciencies del Deporte organizáu pola Universidá del Fútbol de Pachuca, que por primer vegada se celebra na capital asturiana. Esti alcuentru, de calter internu pal Club y la Fundación, xuntará a especialistas del ámbitu sanitariu y deportivu, contará cola participación de los Servicios Médicos del Real Oviedo, FC Barcelona y Atlético de Madrid, asina como cola presencia d'estudiantes de Medicina de la Universidá d'Uviéu y alumnos internacionales. Amás, incluyirá una charra maxistral de Toni Nadal a la que van asistir toles disciplines del Club y la so Fundación.
Ese mesmu día va tener llugar tamién l'estrenu del documental oficial del centenariu, producíu por Informe Plus. La presentación contará cola asistencia d'aficionaos y supondrá la primer proyección pública d'una obra concebida pa preservar la memoria emocional del Club al traviés de los sos protagonistes y la so hestoria.
La selmana va culminar el sábadu 28 de marzu con ún de los díes más esperaos: l'Eventu del Centenariu, un actu que va entamar dende les 13:00 hores cola fan zone y que va siguir a les 18:00 hores cola celebración de la final del Tornéu de les Estrelles de Mahou, na que van participar equipos d'abonaos del Club. Amás, los oviedistes tamién van poder disfrutar mientres la xornada de les actuaciones de Javi Robles y la Real Banda de Gaites 'Ciudá d'Uviéu'. Tres ello, va tener llugar l'alcuentru que va enfrentar a los equipos Amigos de Santi Cazorla y Amigos de Esteban Suárez, onde se va xuntar a futbolistes históricos y grandes figures venceyaes al Real Oviedo.
El día va contar con un ampliu ambiente festivo previu na esplanada del párking del Carlos Tartiere, en collaboración con APARO y Fondo Norte.
Con esta amplia programación, el Real Oviedo vive una selmana histórica na que deporte, arte, cultura y compromisu social van de la mano pa celebrar cien años d'identidá azul, reforzando'l vencellu ente'l Club, la ciudá y una afición que sigue siendo'l verdaderu motor de la so hestoria.