El Real Uviéu llegó a un alcuerdu pa facese colos servicios del mediocampista Ramón Folch Frigola, “Ramón Folch”, pa les dos temporaes vinientes.
El mediocentru, de 27 años d’edá, nació’l 4 d’ochobre de 1989 en Reus. Ramón Folch tien una trayectoria dilatada depués de militar nel FC Vilafranca, Cambrils, CF Amposta, UB Conquense y CF Reus Deportiu, club del que llega procedente, nuna temporada na que xugó 39 partíos, axuntando 3.510 minutos y anotando cuatro goles.
Ramón Folch ye un mediocentru de 1,82 metros, que destaca pola so calidá, bon físicu y visión de xuegu. Na so última campaña nel Reus, el catalán estrémase como ún de los xugadores que más pases completó de la Liga 1|2|3, con 2.178, siendo al empar el segundu con más recuperaciones nesta temporada, con 288, namás una menos que’l líder.
El mediocentru va empezar la pretemporada’l día 10 de xunetu, onde va conocer los sos compañeros nuevos y va trabayar baxo les órdenes de Juan Antonio Anquela pa tar a disposición dafechu del técnicu nel momentu en qu’empiece la temporada.
Trayectoria:
(2008/09) FC Vilafranca
(2009/10) Cambrils
(2010/12) CF Amposta
(2012/13) UB Conquense
(2013/17) Club de Fútbol Reus Deportiu
La presentación oficial de Ramón Folch como xugador nuevu del Real Uviéu va facese’l xueves que vien, 6 de xunetu, a les 13:30 hores nel Carlos Tartiere, con reconocimientu médicu yá superáu na Clínica Asturies.
El mediocentru nun va facer declaraciones hasta’l momentu de la so presentación oficial.
