El Real Uviéu dexó escapar una gran oportunidá en Tarragona de volver asitiase en mediu de la llucha del play off d’ascensu. El conxuntu uviedista sumó un puntu que lu pon a dos de distancia cola sesta plaza nun partíu que tuvo dos partes bien estremaes.
La primer metá empezó como acabó, bien controlada por un Real Uviéu qu’introdució dos cambeos na alliniación inicial, dambos n’ataque. Carlitos y Nando en punta xunto a Toché y Susaeta, protagonizaron les primeres ocasiones de peligru del equipu uviedista. Col control absolutu del balón, y depués d’un par d’avisos, un gran centru de Susaeta dende la derecha llegaba directu al área pa que Carlitos namás tuviere qu’emburriar y anotar el primer gol uviedista. El segundu diba llegar de botes de Toché, depués d’una gran presión de Christian Fernández, qu’aprovechaba un malentendíu ente la defensa y el porteru pa bombiar el balón y anotar el cero a dos dende fuera l’área. Costas tuvo una gran oportunidá a balón paráu xusto anterior al segundu gol, y la más clara a la fin de la primer metá diba ser pa Nando, depués d’una gran xugada individual, pero atayaba’l meta local.
Na segunda metá camudó dafechu’l guión del partíu. El Nástic salió a por más, y el Real Uviéu trató d’aguantar les truñaes locales, pero nun balón sueltu na frontera del área l’equipu catalán anotaba l’un a dos, y a los azules costó-yos reaccionar. Hierro dio-yos entrada a Vila y Saúl, pero’l segundu llegó na mesma situación franca na frontal, depués d’un balón refugáu, y obra otra vez de Tejera. Al Real Uviéu nun-y salió nada n’ataque, nun siendo una opción de Toché nos compases postreros del alcuentru que marchó fuera.
Un empate insuficiente pal Real Uviéu, pero que lu caltién a dos puntos de los puestos de play off d’ascensu.
