Un Oviedo de más a menos cai derrotáu nel Spotify Camp Nou

El Real Oviedo marchó de balde del Spotify Camp Nou tres un partíu de dos cares, nel que una gran primer parte de los ovetenses nun tuvo continuidá tres la reanudación. El conxuntu azul compitió con personalidá y solidez nos primeros 45 minutos, pero dos errores decisivos na segunda metá inclinaron l’alcuentru a favor del FC Barcelona, qu' acabó imponiéndose por 3-0.

Los de Guillermo Almada firmaron una notable primer parte nel Spotify Camp Nou, onde l’equipu coló al descansu con empate ente’l combináu catalán.

 

El conxuntu azulgrana llevó’l pesu de la posesión dende l’entamu, moviendo’l balón con paciencia, pero atopóse con un Oviedo mui bien plantáu nel césped, seriu y ordenáu, que supo zarrar espacios y minimizar los riesgos nos primeros 45 minutos.

 

El dominiu territorial del Barça nun se tradució en ocasiones clares de peligru sobre la portería defendida por Aarón, que vivió una primer parte relativamente tranquila hasta’l tramu final. Foi entós cuando’l guardameta carbayón tuvo que intervenir con aciertu pa despeyar un remate de Raphinha, la acción más peligrosa del rival antes del descansu y la única que esixó una respuesta de verdaderu méritu.

 

Lloñe de limitase a defender, el Real Oviedo tamién supo llevar peligru a la portería de Joan García. Les internaes d' Hassan pela banda xeneraron constantes problemes a la zaga local, ente que Chaira tamién se mostró mui participativu dende’l costáu opuestu. En resume, un gran primer tiempu del conxuntu azul, que aguantó’l tipu nun escenariu esixente y marchó al descansu con un valiosu empate ensin goles.

 

La reanudación nun tuvo nada que ver con lo visto enantes del descansu. Nada más entamar la segunda parte, un error de Carmo na salida de balón foi castigáu de mou inmediatu pol FC Barcelona. Dani Olmo nun perdonó y, con un disparu certeru, batió a Aarón Escandell p’abrir el marcador y camudar por completu’l guión del partíu nel Spotify Camp Nou.

 

El golpe dexó tocáu al Real Oviedo y, apenes unos minutos dempués, llegó’l segundu tantu azulgrana. Un mal pase de David Costas a Aarón Escandell permitió que Raphinha se plantara solu ante’l meta y resolviera’l man a man con una elegante picada per enriba del guardameta. Dende esi momentu, el Barça fixo se dueñu absolutu del balón y de les ocasiones, ampliando la so ventaya hasta’l 3-0 con un golazu de Lamine y dexando ensin opciones a un Oviedo que yá nun atopó la solidez nin la personalidá amosaes na primer parte.

 

Guillermo Almada movió’l banquillu en busca de reacción, dando entrada a Nacho Vidal y Fonseca nel minutu 65 por Reina y Lucas, y yá na recta final a Santi Cazorla, Borbas y Brekalo por Colombatto, Viñas y Hassan.

 

 Sicasí, los dos errores iniciales de la segunda parte acabaron condenando al conxuntu azul, que marchó de balde de Barcelona.