El Real Uviéu llegó a un alcuerdu pa facese colos servicios del mediocampista McDonald Mariga, "Mariga", pa la temporada que vien.
El xugador, de 30 años d'edá, nació'l 4 d'abril de 1987 en Nairobi, Kenia. Depués de formase n'equipos del so país, y marchar a la Tercer División sueca, Mariga debutó nel fútbol profesional na Serie A italiana nel 2007. Foi nes files del Parma, onde permaneció hasta'l 2010. Un trespasu fallíu al Manchester City por fallu nos trámites burocráticos abrió-y les puertes a Mariga nel Inter de Milán, equipu col que debutó en Champions League nel 2010 y que, dirixíu por Mourinho, ganó seis títulos: Serie A, Champions League, Copa Italia (dos veces), Supercopa Italia y Copa Mundial de Clubes.
Na temporada siguiente, y depués d'unos meses de cesión na Real Sociedá, onde xugó 18 partíos, nel mercáu d'iviernu Mariga volvió a Italia y cediéronlu al Parma. Internacional col so país, Mariga llega agora procedente del Unione Sportiva Latina, de la Serie B, onde la campaña pasada xugó 28 partíos.
McDonald Mariga ye un mediocampista que destaca pol so potencial físicu, capacidá de percorríu, calidá técnica y facilidá na recuperación.
El futbolista va incorporase yá a los entrenamientos, depués de sometese a reconocimientu médicu na Clínica Asturias, y va trabayar a les órdenes de Juan Antonio Anquela na sesión d'esta tarde pa tar a disposición dafechu del técnicu de la qu'empiece la temporada.
Trayectoria:
(2005) Enköpings
(2006-07) Helsingborgs
(2007-10) Parma
(2010-11) Inter de Milán
(2011-12) Real Sociedad
(2012-14)
Inter de Milán
(2015) Parma
(2015-17) Unione Sportiva Latina
La presentación oficial de Mariga como xugador nuevu del Real Uviéu va facese esti martes a les 13:00 h nel Carlos Tartiere.
El xugador nun va realizar declaraciones hasta'l momentu de la so presentación oficial.
AST
