Isidro Lángara ye l’únicu futbolista español qu’apaez na clasificación mundial de los meyores goliadores de tolos tiempos en primer división publicada esti mes pola Federación
Internacional d’Historia y Estadística de Fútbol (IFFHS, poles sos sigles n’inglés). Esa clasificación ta encabezada pol húngaru Ferenc Puskás, que xugó na primer división
del so país y na española. Los únicos xugadores n’activo que figuren nesa llista son el portugués Cristiano Ronaldo y l’arxentín Lionel Messi. Lángara figura nel puestu ventésimu cuartu pol númberu total de goles, anque atendiendo al promediu goliador ocupa la segunda posición, namás per detrás del húngaru Imre Schlosser.
Isidro Lángara llogró 336 goles en 287 partíos xugaos nes máximes categoríes del fútbol español, arxentín y mexicanu, mentes que Schlosser marcó 417 tantos en 318 partíos na primer división húngara y na austriaca. Lángara, defendiendo los colores del Real Uviéu, foi’l primer xugador que se proclamó máximu goliador de la primer división española trés veces siguíes. A él-y correspuende güei tovía’l meyor promediu goliador de la primer división española, 1,16 tantos por partíu. Lángara ye l’únicu qu’encadenó consecutivamente trés hat-tricks en trés partíos na máxima categoría del fútbol español. Naide marcó tantos goles como él nun partíu oficial de la selección española, 5. Na so dómina foi consideráu’l meyor delanteru centru del mundu y foi’l primer xugador que se proclamó máximu goliador de primer división en trés países distintos: España, Arxentina y México.
Isidro Lángara llegó bien mozu al Real Uviéu, con namás 18 años. Na plenitú de la so carrera, tres de consagrase yá como’l gran goliador español, por culpa de la Guerra Civil
treslladóse a México. En 1946 volvió a España y al so Real Uviéu, onde a pesar de tener yá con una edá avanzada pa un futbolista d’aquellos tiempos, entá dio tardes de gloria a los
aficionaos uviedistes y inda marcó un bon númberu de goles.
