Esti mañán comparecía en rueda de prensa l'entrenador del Real Oviedo, Guillermo Almada, enantes de viaxar al Ciudá de València pa enfrentase al Llevant, un partíu trascendental. "Esti partíu y los que queden son finales. Tenemos que tomalu de la mesma manera que los anteriores y tratar de xugar meyor que'l rival pa llevarnos el partíu. Ye una final pa los dos".
Sobre les opciones del equipu de salvarse d'equí a final de temporada y de la presión que eso supone, l'entrenador uruguayu señalaba: "Prefiero dir partíu a partíu y mentalizanos en lo que vien. Debemos ganar que ye lo único que mos va dexar conformes". "Hai que adaptase a les circunstancies que mos toquen vivir. Más allá de la presión que esiste ye l'esporte que mos presta y mos causa placer. Nel fútbol ganar ye lo único que tresmite confianza na xente. Debemos siguir pola llinia que marcamos nos últimos partíos a esceición del día del Rayo".
L'equipu de la capital del Principáu enfréntase al Llevant y pola cabeza d'Almada "namái pasa ganar, soi optimista por naturaleza. Cualquier resultáu de mañán nun asegura nada y quedará muncho campeonatu". Un equipu granota que "tien muy bonos xugadores. Tán con confianza, deberemos buscar la brecha defensiva nun plantel con muy bonos xugadores y un entrenador con munches capacidaes".
Pa finar, l'entrenador azul falaba de la dificultá pa zarrar partíos en dambos equipos. "A ellos pásales como a nós, cústales salvar los partíos ensin que los sos rivales tengan el dominiu. Debemos marcar la superioridá nel xuegu que mos permita llevarnos el partíu".