Michu y Saúl Berjón foron entrenadores una tarde pa una ventena d’abonaos uviedistes ganadores nel sortéu de les places pal Clinic Adidas colos dos xugadores de la primer plantiya.
Depués d’una bienvenida onde dambos-yos esplicaron a los participantes los exercicios qu’había que facer, Michu fíxose cargu de los más pequeños pa que Saúl fixere lo mesmo colos adultos. Un calentamientu, unos rondos, un partidín en dimensiones menguaes, exercicios de pase y remate, y tiros a puerta, compunxeron la sesión d’entrenamientu que s’allargó una hora de duración. Amás, Saúl recibió una sorpresa d’un neñu de 5 años nel so 31 cumpleaños: VIDEU.
N’acabando, toos posaron pa la semeya de familia, y los participantes llevaron un balón, una entrada pal próximu partíu ante’l Sevilla Atléticu, y una semeya con autógrafu de dambos xugadores. Un entrenamientu bien prestosu que seguro que los nuestros aficionaos nun van escaecer.
Gracies a Adidas, y gracies a unos siguidores por participar.
