Goliada nel Carlos Tartiere para siguir suañando. El Real Oviedo vía les cares nesta xornada númberu 27 de LaLiga Hypermotion col Burgos CF nun partíu nel que los azules fueron meyores de principiu a fin y nun dieron opciones a los de Jon Pérez Bolo.
L'ambición y les ganes coles que salieron los uvieinos al alcuentru fueron evidentes dende'l primer minutu. El combináu carbayón sometió al conxuntu burgalés dende l'entamu y nel 14' Sebas Moyano yá s'encargó de poner a los de la capital del Principáu d'Asturies per delantre. El 1-0 nun camudó los planes del Real Oviedo que siguió atacando y en busca del segundu.
Yá en cantu descansu, nel minutu 42, Seoane remató a la perfección un córner botáu por Santi Cazorla para desamarrar la llocura del Carlos Tartiere que vía cómo'l so equipu taba imponiéndose al Burgos CF. Yá nel 45', Sebas Moyano punxo'l segundu na so cuenta particular y el terceru para dexar bien empobináu en choque.
El municipal uvieín despidía a los suyos con ovación anque la fiesta siguiría na segunda metá. Namás empezar el segundu periodu, Sebas Moyano anotaba el so primer hat-trick y arredondiaba una tarde perfecta na que'l cordobés yera'l principal protagonista. Col cuartu, Luis Carrión movió'l banquín y Masca entró al campu en llugar de Dubasin.
Darréu, yá na recta final del choque, Bastón, Homenchenko, Borja Sánchez y Lucas tamién ingresaron al terrén de xuegu onde lo más noticiable foi'l debú del mediocampista uruguayu como nuevu xugador del Real Oviedo. Cuando'l partíu averábase a la fin, Borja Bastón punxo la manina dende'l puntu de final y arredondió una tarde de "10" para tol uvieísmu.
Con esti trunfu, el cuadru carbayón suma 41 puntos y asítiase na sesta posición de la tabla a falta de que remate la xornada. Agora, y cola moral coles nubes, los de Carrión yá piensen nel so próximu compromisu ligueru ante Real Valladolid nel Estadiu José Zorrilla
AST
