El Real Oviedo firmó un empate cargáu d’esfuerzu y orgullu ante’l Villarreal CF (1-1) nel Carlos Tartiere, nel alcuentru correspondiente a la xornada 33 del campeonatu lligueru.

El choque nun pudo entamar peor pa los intereses azules. Nos primeros compases, Dani Calvo cometía penalti sobre un atacante visitante. Dani Parejo asumió la responsabilidá dende los once metros, pero atopóse con un Aarón Escandell que detuvo’l llanzamientu a la perfeición. Sicasí, el colexáu ordenó repetir la pena máxima y, nel segundu intentu, Pépé nun perdonó, adelantando al submarín mariellu.

 

Lloñe de venise abaxo, el Real Oviedo reaccionó con calter. L’equipu dio un pasu alantre y empezó a instalase en campu rival, buscando l’empate con insistencia. Aun así, el marcador nun se movió enantes del descansu, llegando al intermediu col 0-1.

Tres la reanudación, los azules volcáronse dafechu, conscientes de que la victoria yera clave pa siguir peleando pola permanencia. El xuegu volcóse escontra les bandes, con constantes llegaes y centros llaterales que punxeron n’aprietos a la defensa visitante.

Nel 71’, Almada introduxo un triple cambéu y dio entrada a Hassan, Ovie y Cazorla. El premiu llegaría nuna d’eses acciones. Ilyas, con dalgo de fortuna, llograba unviar el balón al fondu de la rede y desataba la llocura nel Tartiere, que creyó na remontada.

 

L’empuxe final foi total y l’Oviedo tuvo’l segundu con un disparu dende la frontal de Colombatto que se marchó por poco per enriba del llargueru. Sicasí, y magar les ocasiones, el segundu nun llegó y l’empate foi’l resultáu final.

Al términu del alcuentru, el Tartiere supo reconocer l’esfuerzu de los suyos, despidiendo con aplausos a un equipu que lo dio too y compitió de tú a tú ante un gran rival. El Real Oviedo suma un puntu que sabe a poco pol desenvolvimientu del partíu, pero que caltién vivu l’espíritu de llucha.

Los azules yá centren la so atención nel próximu compromisu, que llegará esti domingu en casa (16:15 hores) frente al Elche CF, nun nuevu duelu clave pa siguir peleando pol oxetivu.