El Real Oviedo cayó derrotáu por 1-2 ante l’Elche CF nun alcuentru marcáu pola urxencia y la presión, nel que los azules afrontaben una auténtica final na so llucha pola permanencia. El resultáu dexa mui tocaes les sos opciones, nuna xornada que puede resultar decisiva nel desenllaz de la temporada.

 

El partíu nun pudo entamar peor pa los intereses carbayones. Nos primeros compases, Bigas sorprendió a toos con un disparu que superó a Aarón Escandell p'asomu de tol oviedismu. El 0-1 dexó fríu al conxuntu oviedista, que tardó n’asentase sobre’l terrén de xuegu y amosó imprecisiones nel so intentu por reaccionar.

 

L’Elche, cómodu col marcador a favor, supo xugar el so partíu, manexando los tiempos y aprovechando los espacios. Nel minutu 16, los visitantes ampliaron la ventaxa tres una bona xugada colectiva que culminó Gonzalo Villar. Golpe duru col que l’Oviedo marchó pal vestuariu cola necesidá de camudar munches coses.

 

Na segunda metá, el Real Oviedo intentó dar un pasu alantre y volcó’l so xuegu en campu rival, pero costó-y xenerar peligru real sobre la portería defendida por Dituro. L’emburrie, más basáu na voluntá que na claridá, nun terminaba de traducise n’ocasiones clares. Thiago Fernández, Cazorla, Borbas y Javi López salieron nel segundu periodu col oxetivu de camudar les coses.

 

Yá na recta final, Ilias recortó distancies y devolvió la esperanza al Tartiere col 1-2. El gol espoleó a los azules, que vivieron los sos meyores minutos nel tramu final, acumulando llegaes y poniendo n’aprietos al conxuntu ilicitanu. Sicasí, el tantu del empate nun llegó, magar l’emburrie y la insistencia.

 

El pitíu final confirmó una derrota mui dura pa un Real Oviedo que se xugaba prácticamente la vida nesti partíu y que ve cómo les sos opciones de permanencia  escápense muncho.