El Real Uviéu sumó un puntu de la so visita al Mini Estadi nun partíu onde’l conxuntu uviedista medró na segunda metá y pudo inclusive llevar un premiu mayor énte’l filial del FC Barcelona.
Anquela repitió’l mesmu once del domingu pasáu y l’equipu entró bien al partíu, pero’l conxuntu blaugrana foi aumentando la posesión de la que pasaben los minutos. Pucko nun remate demasiao forciáu depués d’una bona xugada de Toché, Aarón y Saúl; y un llanzamientu de Saúl entornáu a la esquierda qu’atayó’l meta local foron los primeros averamientos d’un Real Uviéu que nos siguientes minutos trabayó a fondu en defensa. Folch tuvo la siguiente nun remate, de primeres, que marchó alto. Llegó entós l’empate del FC Barcelona B, cuando restaben cinco minutos pa llegar al descansu.
Na segunda, el conxuntu uviedista salió a pol empate dende’l primer minutu. Tuvo l’empate’l Real Uviéu nun saque d’esquina que remató Folch nel primer palu, pero atrapó’l porteru. Anquela dio-y entrada a Linares dende’l bancu y el puxu uviedista vio compensáu’l so trabayu nun córner que cabeció Carlos Hernández pa poner l’empate en marcador. Toché tuvo’l segundu nun remate que coló alto, a centru de Cotugno dende la derecha. Linares tampoco nun atinó nel segundu palu, con un balón qu’espeyó la defensa raspiando’l poste. Juan Carlos intervieno namás una vez, con un disparu que s’envelenare desque raspió na zaga uviedista, y el Real Uviéu tuvo les últimes opciones nel añedíu, ensin atopar mayor premiu qu’un puntu de la so visita al Mini Estadi.
L’equipu va entrenar mañana en Barcelona primero de volver p’Asturies. El próximu entrenamientu n’El Requexón va ser el martes a les 10:30 hores.
