CD Mirandés 2 - Real Uviéu 2
Alliniaciones:
CD Mirandés: Sergio, Paris, Kijera, Israel, David Prieto, Albistegui, Antonio Romero, Ruper, Cervero, Borja, Yanis. Tamién xugaron: Limones, Dani Carrillo, Mario, Diego Peláez, Jaime Santos, Pito Camacho, Andrés del Olmo.
Real Uviéu: A. Herrero, Johannesson, Carlos Hdez., Ramón Folch, Linares, Matej Pucko, Edu Cortina, Mariga, Valentini, Saúl Berjón y Mossa. Tamién xugaron: Gorka, Fran, Josín, Jimmy, Javi Mier, Ernesto y Steven.
Goles: Pito Camacho (min 73) y Yanis (min 83); Linares (min 20 y min 51, de penalti)
El Real Uviéu sumó un empate a dos goles nel penúltimu amistosu de preparación, na so visita a Anduva, nun partíu que’l conxuntu uviedista tuvo controláu tol tiempu, y nel que los postreros venti minutos foron pal bon puñáu de canteranos qu’Anquela llevó hasta Miranda de Ebro.
La primer parte empezó con un once onde tamién arrincaba de mano Edu Cortina. El conxuntu uviedista, de blanco y negro n’Anduva, tuvo la primer ocasión nun llanzamientu de falta de Saúl Berjón qu’atrapó’l porteru local, a los quince minutos de partíu. Poco depués diba llegar el primer gol del alcuentru, frutu d’una bona xugada per banda otra vez de Saúl, que sacó ente trés rivales un pase a lo fondero pa la carrera de Linares, que s’aprovechó del tracamundiu ente defensa y porteru y disparó cruciao dende la esquierda, anotando’l primer gol del alcuentru. Con una defensa seria y ensin averamientos del Mirandés al área d’Alfonso, Pucko metióse n’área con una bona xugada individual, qu’acabó tornando a córner la defensa cuando preparaba’l llanzamientu.
Na segunda metá y ensin cambeos nes files uviedistes, llegó’l penalty. Edu Cortina cayía valtáu n’área y Miguel Linares firmaba’l segundu dende los once metros. Anquela repartió entós minutos, dándo-yos entrada a los seis canteranos na convocatoria, qu’acabaron l’alcuentru, xunto al porteru Gorka. Pucko tuvo la postrera nun xu potente dende la derecha, qu’atayó Limones. Llegó entós la remontada del Mirandés, con goles de Pito Camacho nun fallu defensivu uviedista, y de Yanis pa poner l’empate. Gorka intervieno pa espeyar a córner un balón qu’entraba pel llargueru, y Steven tuvo la postrera nun llanzamientu de lloñe que buscaba la escuadra y marcho esviáu.
L’equipu de Juan Antonio Anquela vuelve a Uviéu, con entrenamientu nuevu previstu pa mañana sábadu, dende les 11:00 hores n’El Requexón, y el postrer amistosu de la pretemporada, dende les 19:00 hores en La Veigona (L.luarca) énte’l Real Valladolid.
