El pasáu sábadu, na previa del alcuentru ente'l Real Oviedo y l'Atlético de Madrid nel Carlos Tartiere, l'oviedismu vivió un momentu cargáu de simbolismu y emoción col saqué d'honor protagonizáu por Juan Manuel Fernández González. L'exfutbolista azul recibió esti reconocimientu por ser el capitán de mayor edá que más veces llevó'l brazalete del primer equipu y que continúa ente nós na actualidá, un homenaxe que pon en valor la so trayeutoria, lideralgu y fidelidá a unos colores.
Nacíu'l 29 de marzu de 1940 en Orillés (Ayer, Asturies), Juan Manuel incorporóse en 1960 al Vetusta, onde entamó a forxar una trayeutoria marcada pol compromisu y amor a los colores azules. Llateral izquierdu d'enorme proyección, el so prometedor futuru llevólu a firmar contratu col primer equipu en 1962.
El so debú oficial col Real Oviedo producióse'l 3 de payares de 1963, nun escenariu y ante un rival que quedaríen gravaos pa siempre na so memoria. Aquel día, el conxuntu carbayón impúsose por 0-1 al Atlético de Madrid nel Stadium Metropolitano, con Juan Manuel formando parte del once oviedista nel so estrenu na élite.
Col pasu de los años, el xugador consolidóse como pieza clave del equipu, hasta convertise en capitán del primer equipu. La so trayeutoria siempre estuvo lligada al escudu oviedista, defendiendo la camiseta azul hasta la so retirada al términu de la temporada 1975-76. Magar cuntar con ufiertes pa prolongar la so carrera n'otros clubes, decidió colgar les botes y zarrar la so etapa como futbolista profesional siendo xugador d'un solu club.
Décades dempués, el destín volvió xunir la so hestoria cola del Atlético de Madrid. El mesmu rival ante'l que debutó como xugador del primer equipu foi testigu, esti sábadu, del so homenaxe dende'l centru del campu del Carlos Tartiere. Un saqué d'honor que simboliza la memoria, l'orgullu y la identidá d'un club que nun escaez a quienos escribieron la so hestoria con entrega y llealtá.