Tal día como güei, un 17 de febreru, nel añu 1929, el Real Oviedo xugaba ante'l Valencia, nel estadiu de Mestalla, el so primer partíu nel recién creadu Campeonatu Nacional de Lliga.
El Real Oviedo entamó en Segunda División la so participación na Lliga, yá que nun llogró plaza en Primera División. Ambes categoríes entamaron constando de diez equipos cada una.
La alienación del conxuntu ovetense pa afrontar aquel alcuentru foi la siguiente: Oscar; Calichi, Trucha, Mieres, Abdón, Cubano, Chuché, Polón, Urrutia, Barril, Tamargo.
Nel minutu 17 del partíu, cuando'l equipu carbayón perdía por 1-0, Chuché facía'l que yera'l primer gol del Real Oviedo en Lliga. A los 5 minutos de la segunda parte, Polón llogró'l tanto que ponía al equipu asturianu por delantre nel marcador, por 1-2. El partíu concluyiría cola victoria del equipu local por 4-2.
La fotografía que ilustra esti testu amuesa al alleranu José María Velasco Álvarez, Chuché, autor del primer gol del Real Oviedo en Lliga y que años dempués sería presidente del club carbayón.