Yera’l tercer alcuentru en menos d’una selmana y, depués de dos empates, el Real Uviéu quería una victoria. Anquela repitió’l mesmu once titular que’l miércoles pasáu nel Carlos Tartiere, col únicu cambéu de Valentini en cuenta de Verdés, y la vuelta de Christian Fernández desque cumplió sanción.
Nun pasaren trés minutos cuando la mala suerte cebóse col equipu de Juan Antonio Anquela. Christian Fernández anotaba en puerta propia’l primer gol del partíu, y el Granada púnxose per delantre dende l’empiezu. El Real Uviéu controló los primeros cuarenta y cinco minutos, col conxuntu local ensin esforciase a fondo n’ataque. Los averamientos del conxuntu uviedista a la meta de Javi Varas foron sobre manera a balón paráu, y nun remate de Toché nel primer palu que’l meta atayó na raya de gol.
Depués del descansu, el Granada volvió dar otru golpe d’efectu col dos a cero que diba resultar definitivu. Quedaba munchu partíu, pero’l Real Uviéu foi incapaz a remontar a pesar del doble cambéu inmediatu qu’Anquela introdució dende’l bancu, con Linares y Johanneson entrando de refrescu. El Granada tuvo opciones d’ampliar la ventaya, y Juan Carlos unvió a córner un mano a mano que podía ser el terceru. Javi Varas atayó en dos ocasiones primero del final, y el partíu acabó con una victoria local nel primer alcuentru de la temporada onde’l Real Uviéu foi incapaz a facer gol.
