El Real Oviedo encaxó una dura derrota ente'l Girona, pola mínima, y con gol del ex oviedista Yoel Bárcenas.
Ziganda apostó por repitir l'once de la última xornada, con un solu retoque n'ataque: la entrada de Obeng acompañando en punta a Blanco Leschuk, en desterciu de Borja Sánchez, que'l so llugar en banda ocupaba d'entamu Nahuel. Tres una primera media hora na que'l control del xuegu yera del conxuntu catalán y con una xugada protestada tres cayida de Tejera na área na que'l colexáu non vió penalty, Gustavo Blanco retiróse trés un fuerte golpe nes cervicales que-y llevaba directu al vestuariu. Borja Sánchez entraba nel so llugar y Nahuel asitióse d'acompañante de Obeng como referencia en punta. Precisamente de les botes de Borja Sánchez nacía la xugada de peligru más clara de la primer metá, con un centru dende la esquierda que Edgar remataba de cabeza y colábase fora por pocu.
Na segunda metá, el guión del partíu escurría pol mesmu camín, hasta que Bárcenas nuna gran xugada invidual anotaba'l cero a unu que, a la fin, daría-y los tres puntos al conxuntu catalán. Movía banquín Ziganda dando entrada a Rodrigo y Borja Valle de refrescu en punta, y el Real Oviedo entornóse n'ataque, con hasta dos causes clares que nun llegaron a materializase.
Finalmente, y tres el pitíu final, Ziganda era espulsáu al averase al colexáu y realiza-y una serie d'apreciaciones que-y costaron la tarxeta colorada directa. Un duru golpe pal equipu que va volver al trabayu mañana dende les 10:30 hores n'El Requexón.
