Repitiendo once per tercer xornada consecutiva, el Real Oviedo buscaba sumar una nueva victoria, la segunda nel Carlos Tartiere para despidir el 2019. Pero nun pudo ser. El líder, el Cádiz, llegaba al estadiu uvieín con 47 años en contra, pero repúsose de la estadística con un trunfu non exentu de polémica durante les dos partes del alcuentru.
Los primeros minutos escurrieron pol guión del xuegu que'l conxuntu oviedista amosara nos últimos alcuentros. Bones combinaciones y dominiu del balón, anque ensin llegar a crear peligru. El Cádiz taba controláu, pero na primera, llegó y nun perdonó. Un centru a la área de Salvi yera cabeciáu por Alex Fernández a la media hora de partíu poniendo'l cero a unu. Tuvo Tejera la más clara, con un disparu dende la frontera qu'unviaría Cifuentes a córner. La primer parte terminaría marcada pola agresión de Fali non decretada a Christian Fernández, pola que'l defensa oviedista salía del terrén de xuegu cola ñariz ensangrecida tres coldazu na área. El colexáu nun decretó nin falta, y llegóse a la posa del partíu con un gran enfadu de l'afición uvieina.
Yá na segunda metá creció'l Cádiz col marcador a favor, y col Real Oviedo entornáu metió'l segundu, primero anuláu per fora de xuegu, y tres revisión de VAR validáu como gol. El Real Oviedo intentólo dempués con más corazón qu'aciertu, y a pesar de los sos acercamientos nun llogró retayar el marcador nin xenerar ocasiones clares de gol.
Una derrota que duel, nel Carlos Tartiere, antes del postreru partíu del añu'l próximu sábadu nel Sardineru ante'l Racing de Santander.
