El Real Oviedo entamó l'añu con ambición en Mendizorroza. Los d'Almada afrontaben el so primer compromisu del 2026 cola clara intención de sumar de tres y dar un pasu firme hacia l'oxetivu de la permanencia. Nun alcuentru marcáu pol intensu fríu que facía en Vitoria, el conxuntu azul salió decidíu, concentráu y con personalidá, firmando una primer parte notable na que namái-y faltó'l premiu del gol.
Dende'l pitíu inicial, l'Oviedo fíxose col control del partíu y dominó'l xuegu durante, sobre manera, los primeros 35 minutos. La ocasión más clara llegó namái entamar, cuando Costas elevóse a la salida d'un corner y el so potente testarazu estrellóse nel traveseru. Pocu dempués, Viñas dispuso d'un mano a mano clarísimu que nun llogró convertir, perdonando una oportunidá inmejorable pa adelantar a los carbayones. El dominiu azul traducíase en llegaes constantes y sensación de peligru sobre la portería llocal.
El conxuntu oviedista volvió a rozar el gol al filu del descansu, nuna aición embarullada dientro del área na que un balón muertu cayó a Reina na área pequeña. El centrucampista dubió na definición y Sibera llogró atrapar l'esféricu. Per parte del Deportivu Alavés, la ocasión más peligrosa de la primer metá llegó con un remate dende la frontal que tamién finó estrellándose nel traveseru, ensin que Aarón Scandell pudiera intervenir. Ensin goles, pero con bones sensaciones, l'Oviedo marchó al descansu.
Dempués del pasu per vestiarios, la insistencia de la primer metá tuvo'l so premiu col gol de Viñas. Gran xugada combinativa que materializó l'uruguayu pa poner el 0-1. L'ariete tuvo'l segundu pocos minutos dempués con un mano a mano ante Sivera que'l guardameta llogró detener. La falta de gol volvió a lestrar a un Oviedo que pasó de duplicar la so ventaxa a ver como Boyé anotaba un golazu de falta pa firmar les tables.
Col 1-1, Viñas recibió la segunda tarjeta amarilla y dexó al equipu con diez. Aarón Escandell evitó'l segundu con dos bones intervenciones ante les llegaes del Alavés, que aprovechó la superioridá numérica. Protesoni tamién vio la segunda amarilla nel 88´ pa dexar a dambos conxuntos con diez.
Nun hubo tiempu pa más y l'Oviedo marchó con un solu puntu de Mendizorroza a pesar de disfrutar de les aiciones más clares del alcuentru.
