El conxuntu de la capital del Principáu enfrentábase na tarde de güei a Osasuna n’El Sadar con dos novedaes nel once respeuto al partíu ante’l Betis nel Carlos Tartiere. Luengo sustituyía al sancionáu Carmo y Viñas entraba na punta d’ataque por Forés.
Nada más arrancar, yá la tuvo’l conxuntu azul, güei cola so tercera equipación. Saque de banda que, tres una porfía de Viñas, doblaba atrás Reina na llinia de fondu, pero l’uruguayu nun llograba conectar el remate con claridá y el balón marchaba desviáu.
Quitóse de riba la presión inicial del Oviedo’l conxuntu navarru, que tendría una bona ocasión tres un disparu de Víctor Muñoz. Aarón Escandell repelía seguru baxo palos el disparu de quien acabaría convirtiéndose nel protagonista del duelu nes postrimeríes del partíu.
A balón parau llegaba’l primeru de los carbayones. Córner sacáu en curtio pa Hassan, que centraba como manden los cánones, y remate estratosféricu de Fede Viñas. Marca los tiempos l’ariete y’l testarazu va al palu curtio faciendo inútil la estirada de Sergio Herrera nel minutu 39.
Poco dura l’alegría siempres na casa del probe. D’un posible penalti a Ilyas que acabaría en gol col brazu de Budimir, anulao, al fatídicu minutu 45. Budimir ponía les tables nel marcador con un testarazu tres desequilibrar llevemente a Luengo. Como yá ocurriera la selmana pasada —n’aquella ocasión con Carmo—, el colexáu nun estimaba abonda la carga pa señalar infracción.
Col empate marchaben dambos conxuntos al descansu nun partíu a too o nada que siguiría la mesma tónica tres la reanudación. Ocasiones pal Oviedo, que perdonaba; tamién les tuvo clares el conxuntu navarru, hasta que nel 67 y de nuevu a balón parau, el cuadru carbayón llograba meter el balón na rede. Reina, que yá tuviera una clara ocasión nel 54, revolvíase nel área pequeña pa facer, esta vegada sí y a la media vuelta, el segundu pal Real Oviedo.
Otra vuelta de tuerca y, namás siete minutos dempués, Budimir llograba nel 74 el segundu na so cuenta particular al rematar ensin marca nuna xugada y un centru mal defendíos polos d’Almada.
Nun se rindió l’Oviedo, que vería nel 81 cómo, de manera incomprensible, el colexáu Alejandro Quintero González acudía al VAR pa finalmente nun señalar como penalti una clara mano despegada de Boyomo que interceptaba un pase de Fede Viñas. Nun acabaríen equí les desgracies azules. Nel 91, una serie de rebotes desafortunados dexaben l’esféricu nes botes de Víctor Muñoz, que con un fuerte disparu llevaba la lloucura a El Sadar.
La última pal Real Oviedo llegaría tres una tarxeta colorada directa a Catena por una durísima entrada. Acabaría executándose de manera defectuosa la falta dende la frontal por un equipu que se adelantó en dos ocasiones en Pamplona y al que los errores propios y ayenos condenaron a una derrota inmerecida.