Nun se pue facer más

Nun se pue facer más. El Real Oviedo nun pudo pasar del empate ensin goles nun partíu nel que mereció más y onde’l colexáu foi protagonista. Los de Carrión finaron con nueve tres les espulsiones de Cazorla y Viñas na recta final d’un alcuentru que tuvo de too y onde’l conxuntu carbayón dispuso de munches ocasiones pa marcar y llevar los tres puntos.

 

Aarón Escandell, Rahim, Costas, Carmo, Nacho Vidal, Dendoncker, Cazorla, Colombatto, Ilyas, Viñas y Rondón. Asina salió l’Oviedo a esta xornada númberu 15 de Primer División. Los primeros averamientos fueron pa los llocales, que con disparos de Dendoncker, Colombatto ya Ilyas rozaron el primeru.

 

Un remate de Viñas, que nun atopó rematador nel segundu palu, tamién foi bien claro pa abrir el marcador. Pela so parte, el RCD Mallorca tamién llegó con peligru na primer metá. Sicasí, una mano prodixosa d’Aarón a tiru de Virgili fizo que’l 0-0 fuese’l resultáu col que nos diríemos al descansu.

 

Tres la reanudación, l’Oviedo siguió insistiendo y Carrión decidió dar entrá a Hassan. Les ocasiones siguíen llegando, pero lo importante, el gol, nun apaecía.

 

El tramu final del alcuentru entró nun xuegu más direutu y ehí’l colexáu adquirió protagonismu coles sos decisiones. Cazorla y Viñas vieron la colorada direuta por dos entraes qu'el Tartiere nun comprendió, y el 0-0 foi’l resultáu col que finó’l partíu.

 

Col enfotu entá nel cuerpu de tolos presentes nel Tartiere, al Real Oviedo nun-y queda otra que llevantase, reponese y lluchar contracuellu. Próximu partíu: Sevilla CF nel Estadiu Ramón Sánchez-Pizjuán.