Al Real Oviedo se -y escápa la victoria

Vuelve’l fútbol al Carlos Tartiere. El conxuntu carbayón estrenábase en 2026 na casa y facíalo midiéndose al Real Betis Balompié. Pa esti alcuentru y por cuenta de los cambeos obligaos, Guillermo Almada presentó’l siguiente once titular: Aarón Escandell, Rahim, Costas, Carmo, Lucas, Sibo, Colombatto, Reina, Hassan, Ilyas y Forés.

 

El Real Oviedo intentó amosar dende l’entamu la imaxe vista en Mendizorroza frente al Deportivo Alavés, anque’l choque foi bien distintu. Los andaluces salieron al campu coles ganes de resarcise de la dura derrota nel Bernabéu de la xornada anterior y Cucho dio’l primer avisu. 

 

Gran disparu del delanteru béticu que s’estrelló na madera.

Un fallu na entrega d’Aarón Escandell supunxo tamién una bona oportunidá pal Real Betis.

 

 Sicasí, el disparu de Fornals atrapólu’l meta carbayón. Los nuestros tamién tuvieron la so ocasión con un centru de Hassan al segundu palu que nun atopó’l remate de Forés nin de Reina por mui poco. Pasada la primer media hora de partíu, una perda de Sibo nel mediu del campu fizo que Cucho viera adelantáu a Aarón y probara fortuna dende mui llueñe. El so disparu, pa fortuna oviedista, foi al llárgueru.

Tres el pasu polos vestuarios, Ilyas tuvo la primera col centru de Hassan, pero’l so remate foi bloquiáu por un defensor. Nel 54’, Fonseca sustituyó a Sibo na medular y l’Oviedo trató de tener más el balón y dar un pasu alantre. Acto siguíu al cambéu, Antony filtró un gran pase interior pa Cucho y Aarón, con una bona mano, evitó’l 0-1.

 

Nel minutu 64, Ilyas Chaira desató la lloucura del Tartiere con un golazu y punxo al Oviedo per delantre. Gran disparu dende fuera del área del estremu pa anotar el so primer gol de la temporada. Yá nel 76’, Guillermo Almada movió’l banquillu y dio refrescu coles entraes de Brekalo y Borbas nel terrén de xuegu. Cuando paecía que los trés puntos yá yeren una realidá, Lo Celso puso les tables nuna xugada polémica na que los futbolistes del Real Oviedo reclamaron falta, pero l’árbitru nun señaló nada. Javi López y Dendoncker fueron los últimos cambeos azules, pero nada camudó.

 

Nuevu empate pal Real Oviedo, que sigue rozando la victoria pero que, por un factor u otru, nun acaba de llegar. Próxima parada, El Sadar frente a Osasuna.