Cola baxa de Johannesson cola so selección, Anquela nun tuvo más remediu que retocar el so once titular nel Nou Estadi. Cambió l’once y cambió l’esquema, volviendo formar con defensa de cuatro na primer metá y con Forlín per delantre de la zaga.
Los primeros averamientos del Real Uviéu llegaron de botes d’Aarón, primero con un disparu tres d’una bona paré con Saúl, y depués con un xu que Dimitrievski atrapó en dos tiempos. Linares tuvo la d’él, nun remate forciáu ente trés defensores del conxuntu catalán, y nuna xugada d’ataque’l colexáu decretó penalty sobre Carlos Hernández. Llanzólu Saúl Berjón dende los once metros y fallólu. Ramón Folch volvió tener una ocasión clara, nun remate de cabeza, que marchó esviáu por poco, y llegaba entós el penalty a favor del Nàstic de Tarragona, que se convertía nel primer gol del partíu. El Real Uviéu aguantó hasta’l descansu, y na segunda metá too cambió.
Con un cambéu nel sistema volviendo a la defensa con trés centrales y más llibertá n’ataque pa Mossa y
Cotugno, llegó la meyor versión uviedista. Nes dos primeres xugaes, dos ocasiones clares en dos centros de Mossa pa remate de Linares. Dimitrievski aparó un bon remate de Linares y unvió a córner. El Real Uviéu acorripiaba al conxuntu local hasta llograr l’empate. Diba ser Carlos Hernández, en llanzamientu de córner sacáu ente Saúl Berjón y Aarón Ñíguez, quien punxo l’un a un. El Nàstic buscó’l segundu, pero a la fin el premiu foi pal Real Uviéu, en forma otra vez de penalty cometíu sobre Mossa que tresformó Aarón nel un a dos definitivu, yá en tiempu añedíu.
Trés puntos fundamentales lloñe del Carlos Tartiere pa siguir medrando dende’l trabayu.
