Guillermo Almada compareció esti vienres ante los medios de comunicación na previa del últimu entrenamientu de la selmana, enantes del choque que va enfrentar al Real Oviedo col Girona esti sábadu nel Carlos Tartiere. El técnicu azul foi claro dende'l principiu y calificó l'alcuentru como “una final”, subrayando la importancia de sumar los tres puntos pa entamar una dinámica positiva.
“El partíu afróntamolu como una final. Tenemos que sumar de tres pa enganchanos a una bona racha”, señaló Almada, quien insistió na necesidá de caltener una fuerte mentalidá competitiva. “L'actitú ta na cabeza, non nes condiciones, y eso nun nos pue faltar. L'aspeutu mental ye clave”, remarcó.
En cuanto al rival, el entrenador oviedista destacó la calidá del Girona y el trabayu del so cuerpu técnicu, anque punxo'l focu nel propiu rendimientu del equipu. “Más allá del análisis del rival, lo que más nos preocupa ye que faigamos un bon partíu, que estemos activaos n'ataque, recuperemos la solidez defensiva y nun repitamos errores que ante equipos d'esti nivel páguense mui caros”, esplicó.
Almada tamién se refirió a delles situaciones individuales. Sobre Thiago Fernández, destacó la so bona adaptación tanto a nivel humanu como futbolísticu. “Ye un xugador de banda que s'integró mui bien al grupu y creemos que pue aportanos coses positives como variante ofensiva”, señaló.
En rellación col zarru del mercáu de fichaxes, el técnicu confirmó que'l Club sigue trabayando pa reforzar el frente ofensivu. “Tán faciendo esfuercios pa intentar sumar dalgún xugador más arriba. Nun ye cenciellu, pero la intención ye ampliar les nuestres opciones ofensives”, indicó.
Respectu a Álex Forés, Almada foi claro: “Siguimos cuntando con él. Pue complementase con Fede na zona ofensiva y ta entrenando bien”. Nel casu de Dendoncker, esplicó que les decisiones respuenden a cuestiones táctiques y d'equilibriu del equipu, anque valoró'l so compromisu diariu nos entrenamientos.
Sobre Ovie Ejaria, el entrenador descartó una salida y confía na so aportación cuando tea recuperáu: “Ta saliendo de la lesión y pue dános variantes ofensives que güei nun tenemos”.
El técnicu tamién faló de la presión y del momentu del equipu. “Tenemos xugadores con esperiencia que saben convivir cola presión. Un resultáu positivu xenera confianza y la afición siempre va tar si l'equipu tresmite dende dientro del campu”, afirmó.
En cuanto al once inicial, nun descartó modificaciones. “Seguramente faigamos dalgún cambiu. Analizamos de contino'l rendimientu pa escoyer a los xugadores que meyor tán y que más nos puen aportar”, apuntó.
Por últimu, Almada quiso destacar el sofitu de la afición azul y l'ambientu que s'espera nel Carlos Tartiere. “La nuestra afición ye'l nuesu xugador númberu 12. Sentimos el so sofitu permanente y oxalá podamos devolverlu con una victoria que nos dé alegría a toos”, concluyó.