Tal día como güei, un 14 de marzu, nel añu 1926, una comisión del Real Stadium Club Ovetense y otra del Real Club Deportivu d’Uviéu alcordaben una serie de condiciones pa la so fusión, que favorecería la nacencia del Real Uviéu.

Eses condiciones reflexáronse nun documentu que firmaron representantes de dambes entidaes uviedines y que constituyó l’acta prefundacional del nuestru club.

Ente les condiciones soscrites figuraba que’l nome del club nuevu surdíu de la fusión de les dos entidaes diba escoyelu’l Stadium, pero nun podría ser nin Vetusta Real Stadium Deportivu nin tampoco Real Deportivu Stadium, "procurando que sía un nome representativu que nun recuerde nin lleve a desavenencies o antagonismos que tienen que desapaecer".

Amás, alcordóse que los colores del club nuevu seríen “los d’Uviéu cola Cruz de los Ánxeles” y que los estadios del Stadium y del Deportivu, Vetusta y Teatinos respectivamente, diben pasar a tar al cargu de la entidá nueva.

Doce días depués, el 26 de marzu de 1926, el Stadium y el Deportivu firmaben l’acta fundacional que significaba la creación del Real Uviéu.

L’acta prefundacional del club atópase actualmente espuesta en Muséu del Real Uviéu, asitiáu nos baxos del estadiu Carlos Tartiere.