El Real Oviedo celebró esti vienres l'actu de presentación oficial de Jacobo y Aisar Ahmed como nuevos xugadores de la entidá azul.

L'eventu tuvo llugar nel Silken Monumental Oviedo, hotel patrocinador del Club, onde dambos futbolistes comparecieron per primer vegada énte los medios de comunicación tres la so incorporación al Real Oviedo. Jacobo y Aisar Ahmed tán acompañáos por David Fernández, direutor deportivu del Real Oviedo, y por Ángel Zubizarreta, direutor del Hotel Silken Monumental Oviedo, nun actu que se pudo siguir al traviés de los canales oficiales del Club.

“Ye un pasu enorme na mio carrera. Vengo con munches ganes. Namái queda demostralo. Ta siendo súper intensu, lo que vivimos dende dientro ye muncho más de lo que se ve dende fuera. Muncho, muncho trabayu”, destacó Jacobo en primer llugar.

Pela so parte, Aisar Ahmed señaló que "Calero ye un entrenador bien esixente, con muncha enerxía. Aprendiendo conceutos, munchos y bien rápido. Voy dar lo meyor que tengo por esti Club”.

Tres les declaraciones de los dos futbolistes, David Fernández, direutor deportivu de la entidá, señaló que "confiamos en Aisar porque creemos que nos va meyorar'l carril drechu" añadiendo que "col máximu respetu a Lucas Ahijado, col que foi y significó pal Real Oviedo", agradeciendo amás el sofitu y el cariñu del nuesu patrocinador Silken Monumental Naranco, que va siguir un añu más con nós.