L'entrenador del Real Oviedo, Julián Calero, compareció na sala de prensa dempués de la victoria del conxuntu azul ante'l Real Sporting de Xixón nel derbi asturianu.
"Sentí muncha alegría, pero non por min. Yo pertenezco a un grupu, nun podría alegrame por min. Alegreme polos xugadores, pol club, pola afición. Llevaemos tres xornaes equí y nin ganemos nin marcamos, raro pol que fiximos sobre'l campu. Esto foi una alegría por tol mundu, tienes la sensación de tener una deuda con esta xente y quiximos pagála. Cuidé muncho'l nivel d'escitación na previa pa nun equivocanos. Disfrutaron d'un bon partíu de fútbol y por eso voi contentu", esplicó en primer llugar el míster azul.
"Nun sé si'l derbi cumplió les espectatives, pero rozólu. Hai que tener cuidao con estos ambientes porque pueden encoyer a los xugadores y falámoslo, tamos equí pa partíos como esti. Foi un ambiente fantásticu y toi bien contentu por tolo mundu. Esto fáenlo los equipos importantes, ensin esa unión cola xente ye bien difícil avanzar. Vamos pasu a pasu. La forma de pidir-y a la xente que mos sofite ye faciendo partíos como esti", añadió.
Sobre Enzo y el partíu con gol del canteranu, Julián Calero espresó que "dixe l'otru día que nun importa onde se naz pa vivir y sentir un derbi, pa eso nun importa. Evidentemente si yes d'equí tienes la raíz, y Enzo tienla. Diónos unos minutos fantásticos, ta ganándose más y tengo que empezar a ponelu más, el rapaz ta dándolu. Exíxolu muncho nel día a día y alegrome muncho por él. Voi más a lo global que a lo colectivu".
"Toi bien triste y fastidiáu cola lesión de Chris Ramos, saliónnos cara esi gol. Na vida hai que pagar peaxes y saldremos alantre. Hai que tener tranquilidá, ver les pruebes. Dalgo ye, esperemos que seya lo menos posible. Hai que tener tranquilidá. Llesionáronse toos y na mesma posición, hai que guardar la calma. Si nun tengo delanteros hai que poner centrocampistes, y si nun tenemos vamos poner defensas. Lo importante ye tener 11. El fútbol ye esto, problemes y soluciones. En Sabadell reconocí que'l primeru que s'equivocó fui yo y güei acertaron los mios xugadores, tán fantásticos. Nun faltó concentración en nengún momentu, la conexón col estadiu foi tremenda y ganemos xustamente", concluyó.