El Real Oviedo cayó derrotáu esti xueves nel Bernabéu ante'l Real Madrid (2-0), nel alcuentru correspondiente a la antepenúltima xornada de LALIGA EA SPORTS nel que los azules compitieron de tú a tú frente al conxuntu blancu y dispusieron d'ocasiones clares pa haber camudáu'l rumbu del choque.

L'equipu oviedista entamó'l partíu con personalidá, ensin renunciar al balón y plantando cara dende'l primer minutu. Frutu d'esi bon entamu llegó la oportunidá más clara de la primer metá pa los de la capital del Principáu. Una gran aición colectiva finó con Nacho Vidal dientro del área, pero'l so remate marchóse per enriba del traveseru. El llateral azul reclamó amás penalti tres el disparu, anque'l colexáu decidió nun señalar nada.

Cuando'l descansu yá asomaba, una perda del Oviedo permitió al Real Madrid montar una transición rápida que finó col tantu de Gonzalo pa adelantar a los locales al filu del entemediu.

Tres el pasu por vestiarios, el conxuntu azul volvió salir decidíu a buscar l'empat y volvió a rozalu nuna otra aición protagonizada por Nacho Vidal. Reina filtró un pase midíu al desmarque del defensor oviedista, que definió desviau ante la salida de Courtois.

Col pasu de los minutos llegaron los cambios nel conxuntu carbayón. Santi Cazorla saltó al terrén de xuegu recibiendo una sonora ovación por parte del públicu del Bernabéu, nuna de les imáxenes destacaes del alcuentru. Posteriormente tamién tuvieron minutos Hassan, Lucas y Agudín.

Yá na recta final, Bellingham aprovechó una aición ofensiva del conxuntu madridista pa anotar el segundu tantu y sentenciar l'alcuentru.

Derrota pa'l Real Oviedo ante'l Real Madrid y turnu de preparar la próxima xornada, na que recibirá al Deportivu Alavés nel Carlos Tartiere pa despidise de la temporada ante la so afición.