El Real Oviedo cayó derrotáu por 0-1 ante'l Deportivo Alavés nel Carlos Tartiere na penúltima xornada lliguera de la temporada. Un alcuentru marcáu pola necesidá de los visitantes, que se xugaben la permanencia, y poles dificultaes de los azules pa alcontrar fluidez y xenerar peligru n'ataque.

El conxuntu oviedista afrontaba'l choque ensin oxetivos clasificatorios en xuegu, anque cola intención d'ufiertar una última alegría a la so afición na casa. Sicasí, el partíu entamó de la peor manera posible pa los d'Almada. Nel minutu 17, el cuadru babazorro aprovechó una de les sos llegaes pa adelantase nel marcador, un golpe que condicionó'l desenvolvimientu posterior del alcuentru.

La primer metá dexó poques ocasiones y muncho xuegu trabáu. Al Real Oviedo costó-y alcontrar espacios y enllazar aiciones ofensives con claridá ante un rival bien intensu y consciente de lo muncho que había en xuegu. La oportunidá más clara pa los azules llegó a balón paráu, cuando Costas remató de cabeza a la salida d'un corner tres una mala salida de Sivera, anque'l balón marchó rozando'l palu.

Tres el pasu por vestiarios, el técnicu oviedista intentó camudar el rumbu del alcuentru moviendo'l banquillo. Almada introduxo dellos cambios buscando más fondura y dinamismu n'ataque, pero'l guión apenas varió. El conxuntu azul siguió atopándose incómodu, ensin continuidá en campu rival y ensin ocasiones clares pa poner en apuros al guardameta visitante.

Col pasu de los minutos, el Deportivo Alavés supo manejar la so ventaya y el partíu foi consumiéndose ente interrupciones y escases llegaes. Finalmente, el 0-1 finó siendo definitivu, dexando una derrota amarga pal Real Oviedo ante la so afición nel últimu alcuentru de la temporada nel Tartiere.

Agora, al conxuntu azul namái-y queda zarrar el cursu lligueru cola última xornada fuera de casa, onde visitará al RCD Mallorca pa poner puntu final a la temporada.