El conxuntu oviedista afrontaba’l choque ensin oxetivos clasificatorios en xuegu, anque cola intención de brindar una última allegría a la so afición na casa. Sicasí, el partíu entamó de la peor manera posible pa los d’Almada. Nel minutu 17, el cuadru babazorro aprovechó una de les sos llegaes pa adelantase nel marcador, un golpe que condicionó’l desarrollu posterior del alcuentru.

 

La primer metá dexó poques ocasiones y muncho xuegu trabáu. Al Real Oviedo costó-y atopar espacios y enllazar acciones ofensives con claridá énte un rival mui intensu y consciente de lo muncho que había en xuegu. La ocasión más clara pa los azules llegó a balón paráu, cuando Costas remató de cabeza a la salida d’un córner tres una mala salida de Sivera, anque’l balón marchó rozando’l poste.

 

Tres el pasu polos vestuarios, el técnicu oviedista trató de camudar el rumbu del partíu moviendo’l banquillu. Almada introduxo dellos cambeos buscando más fondura y dinamismu n’ataque, pero’l guión apenas varió. El conxuntu azul siguió atopándose incómodu, ensin continuidá en campu rival y ensin ocasiones clares pa poner en problemes al guardameta visitante.

 

Col pasu de los minutos, el Deportivo Alavés supo manejar la so ventaya y el partíu foi consumiéndose ente interrupciones y escases llegaes. Finalmente, el 0-1 acabó siendo definitivu, dexando una derrota amarga pal Real Oviedo énte la so afición nel últimu alcuentru de la temporada nel Tartiere.

 

Agora, al conxuntu azul namás-y queda zarrar el cursu lligueru cola última xornada fuera de casa, onde visitará al RCD Mallorca pa poner puntu final a la temporada.