Nueva xornada en Primer División y nueva salida pal Real Oviedo. Tres del choque en Getafe, el conxuntu azul volvía xugar lloñe de la capital asturiana y nesta ocasión facíalo n’Elche. Conscientes de la importancia de sumar los sos primeros puntos fuera de casa, el combináu dirixíu por Veljko Paunovic presentóse nel Martínez Valero con once formáu por: Aarón Escandell, Nacho Vidal, Calvo, Carmo, Rahim, Hassan, Dendoncker, Sibo, Brekalo, Ilic y Rondón.

Namái arrancar l’alcuentru, Rondón tuvo la más clara tres un fallu na salida de los de Sarabia. El venezolanu recortó al porteiru pero nun tuvo del tou acertáu a la hora de definir y el so disparu marchó desviao. Tres esa gran aición, l’Elche CF nun perdonó na primera que tuvo y al minutu ocho André Silva punxo’l 1-0 tres una gran xugada de Germán Valera.

Los llocales caltuvieron la posesión del balón mientres los primeros 45 minutos y el dominiu del partíu, ente que’l Real Oviedo tentaba de xenerar peligru sobro la meta de Peña pero ensin ésitu.

Tres el descansu, el guión nun camudó y l’Elche salió al campu con una marcha más nuevamente y buscando’l segundu. Rafa Mir unvió’l balón al travesañu tres una gran xugada de grupu y darréu Paunovic decidió dar entrada a Cazorla y Chaira. Namái entrar al campu, una bona paré d’entrambos provocó una gran ocasión nes botes de Dendoncker que llimpió un defensor del equipu rival.

Rondón volvería a tenela tres una indecisión ente’l guardameta y el defensa, pero’l gol siguía ensin llegar pal Real Oviedo. Nacho Vidal ya Ilic tuvieron de ser sustituyíos de mou obligáu y tanto Lucas como Forés foron los escoyíos. Amás, Reina salía en llugar de Sibo y Paunovic esgotaba asina los cambeos.

Durante’l caberu cuartu d’hora, l’Oviedo apretó y tuvo les sos. Forés batió a Iñaki Peña, magar el tantu foi invalidáu por fuera de xuegu prevíu de Lucas. Rondón tamién la tuvo nuevamente pero’l gol del empate siguía ensin llegar y asina se llegó al final del partíu. Derrota pola mínima nel Martínez Valero nun partíu nel que’l Real Oviedo ameyoró colos cambeos na segunda metá pero nel que nun pudo batir la meta llocal.

Agora, y con poco tiempu pa descansar, al equipu yá-y toca pensar nel choque énte’l FC Barcelona del próximu xueves nel Carlos Tartiere.