El Real Oviedo tornaba al Carlos Tartiere tres la remontada en Mestalla con un únicu oxetivu: llograr la segunda victoria consecutiva de la temporada. Enfrente, otru recién ascendíu como el Levante UD, el técnicu azul, Veljko Paunovic, aliniaba'l siguiente once: Aarón Escandell, Rahim, Bailly, Carmo, Lucas, Colombatto, Reina, Dendoncker, Hassan, Brekalo y Rondón.

Salió con una marcha más l'Oviedo al partíu anque poco a poco esi subidón foi apagándose. Hassan, que tres el pitíu inicial, nun dexó d'encarar a la so marca, foi de lo más destacáu de los ovetenses. Sicasí, el Levante UD golpió primero con un golazu de Carlos Álvarez. L'Oviedo reclamó que'l colexáu había impidíu a Reina llegar a cortar la xugada pero les protestes nun sirvieron de nada y el 0-1 subió al marcador.

Tres la reanudación, Ilyas Chaira entró en llugar de Brekalo y los nuestros volvieron salir a por toes. Nel 56´, Cazorla y Viñas tamién entraben al terrén de xuegu por Reina y Rondón. El Real Oviedo tuvo la más clara nel 64´con un remate de cabeza de Carmo que paró maxistralmente'l guardameta del combináu visitante.

Chaira mandó al balón al palu en otra de les más clares de los de Paunovic anque acto siguíu llegó'l segundu del Levante UD. Etta Eyong aprovechó un despexu d'Aarón pa poner el 0-2 y sentenciar prácticamente'l choque. Ovie y Forés entraron na recta final anque'l choque nun cambió y los de Calero lleváronse los tres puntos del Carlos Tartiere. 

Agora, y con parón de seleiciones de por medio, toca trabayar y esforzase entá más pa consiguir los tres puntos frente al RCD Espanyol.