Centráos en ganar al RCD Espanyol. Con esa mentalidá presentábase’l Real Oviedo nel Carlos Tartiere pa encarar la novena xornada de LaLiga EA Sports. Los carbayones víense les cares col conxuntu pericu nel cuartu partíu de la temporada en casa, nel que los de la capital del Principáu queríen sumar tres nuevos puntos en Primera División. Tres la derrota frente al Levante UD, Luis Carrión formó d’entrada con Aarón Escandell, Nacho Vidal, Eric Bailly, David Carmo, Rahim, Hassan, Dendoncker, Colombatto, Ilyas, Ilić y Rondón.

 

Los locales entamaron el partíu con ambición. Nos primeros compases, Ilić tuvo un mano a mano frente a Dmitrovic tres una gran asistencia d’Ilyas. Poco dempués, Hassan probó suerte con un centru que finó nes manes del arquero serbiu. Los azules atopaben espacios per banda, especialmente coles internadaes de Hassan y Ilyas, pero faltó-yos aciertu nel remate final.

 

La meyor combinación ofensiva llegó nel minutu 23: una brillante conducción de Hassan, pase filtráu pa Ilić, que-y cedió a Rondón, anque Riedel tarrió providencial pa evitar el remate del delantreru venezolanu. Los acercamientos nun cesaben y nel 31, un centru tenso d’Ilyas al puntu de penalti tuvo a puntu de ser rematáu por Rondón.

 

Dos minutos dempués, l’Espanyol respondió con un remate de Kike, qu'Escandell sacó con reflejos. Seguidamente, el mesmu Kike volvió a intentalo, esta vegada asistiendo de cabeza a Roberto, cuyo disparu tamién se topó col arquero azul. Escandell, al filu del descansu, volvió a llucise sacando una falta direuta a Pere Milla. Col 0-0 llegóse al descansu, anque’l marcador nun reflexaba les ocasiones xeneraes por dambos.

 

Tres el descansu, l’Oviedo salió decidíu a buscar el gol. La primer ocasión llegó nel 47: Colombatto lluchó un balón nel área y cediólu a Reina, que la mandó al palu derechu de Dmitrovic nun remate casi cayéndose. La reacción del Espanyol nun tardó en llegar y nel 51, tres una xugada d’estratexa, Kike remató nel área, obligando a Aarón a una doble intervención de méritu.

 

Más tarde, los carbayones trenzaron una gran contra que finalizó Hassan con un disparu a les manes del porteru visitante. Poco dempués, Ilyas xeneró otra bona xugada individual que finó por enriba del travesañu. El partíu rompióse, y l’Espanyol aprovechó’l momentu. Nel 72, tres revisión del VAR, el colexáu validó’l primer gol visitante. Carlos Romero centró dende la esquierda, Aarón logró repelir el primer remate, pero’l balón cayó nos pies de Kike García nel segundu palu, que cayéndose empuxó’l 0-1 al fondu de les mayes. Golpe duru pal Oviedo.

 

Tres el tantu pericu, Carrión agotó los cambeos cola entrada d’Álex Forés y Ejaira nel 80. Pero, dos minutos dempués, Pere Milla culminó la xugada de los de Manolo González pa sentenciar el choque. El 0-2 foi un castigu escesivu pa un Oviedo que xeneró ocasiones y plantó cara durante bona parte del alcuentru, pero que nun tuvo la eficacia nin la contundencia del Espanyol. Agora, toca pensar nel Girona FC.