Tres l'empate collecháu en casa énte l'Elche CF, el Real Oviedo viaxaba hasta Granada pa midise al conxuntu nazarí nuna nueva xornada de LaLiga Hypermotion. Pa esti alcuentru, l'entrenador madrilanu, Javi Calleja, introdució delles novedaes nel once y formó d'entamu con Aarón Escandell, Pomares, David Costas, Dani Calvo, Nacho Vidal, Sibo, Colombatto, Portillo, Chaira, Hassan y Alemão.

 

El cuadru local salió meyor al partíu y nun tardaría n'adelantrase nel marcador. Nel 11', Boyé anotó'l primer tantu del partíu nuna de les primeres acciones de peligru pa el andaluces. Tres el tantu encaxáu, los uvieinos nun llograron cafiar la meta rival y namá un remate de Portillo obligó a Mariño a espurrise pa evitar l'empate. Hassan, con delles acciones individuales per banda, trató de xenerar daqué de peligru anque ensin premiu. Poco fútbol azul nuna primer parte que se coló con resultancia de 1-0.

 

Tres el pasu por vestuarios, Seoane entró en llugar de Portillo pa tratar de camudar les coses. Hassan, que nun dexó d'intentalo, tuvo la más clara pa los asturianos con un bon disparu dende la frontera de la área. Sicasí, el so remate colóse raspiando'l palu. Álex Cardero y Sebas Moyano saltaron al verde col intre del segundu periodu pero les ocasiones clares nun terminaben de llegar.

 

Nel postreru cuartu d'hora, el combináu de Javi Calleja apertó más y goció de dalguna oportunidá pa poner les tables. Paraschiv, con un remate tres centru de Hassan, punxo n'apuros a Mariño anque'l so cutió foise fora. Paulino por Hassan foi l'últimu cambéu carbayón del partíu anque la cosa nun camudó. Derrota en Granada y xarru d'agua frío pa un Real Oviedo que se va midir al Málaga CF la próxima xornada.