Partidazu pela zona alta de la tabla. Asina podría resumise esti CD Mirandés vs Real Oviedo que tenía llugar en Anduva. Los azules encaraben un nuevu compromisu ligueru y fízolo coles mires de desquitase tres la derrota énte'l Dépor por 1-2. Pa esti alcuentru, el técnicu, Javi Caleya, modificó l'once y formó d'entamu con: Aarón Escandell, Nacho Vidal, Dani Calvo, David Costas, Rahim, de la Foz, Colombatto, Seoane, Chaira, Viñas y Alemão. 

 

Los primeros minutos tuvieron marcaos pola intensidá y el sacrificiu de dambos conxuntos que yeren conscientes de la importancia de dichu choque. Viñas, qu'estrenaba titularidá, dio'l primer avisu con un remate cruciáu con esquierda que se coló esviáu. La lluvía nun cesó mientres los primeres 45 minutos de partíu ente que'l Real Oviedo trataba d'averase con peligru sobro la meta defendida por Raúl Fernández. 

 

Les ocasiones nun s'asocedíen anque la más clara túvola el cuadru de la capital del Principáu. Seoane, con un bon llanzamientu de falta, estrelló'l balón nel llargueru. Con esta gran acción, el duelu coló al descansu con tou entá por decidir.

 

Tres la continuación, el conxuntu local adelantróse dende los once metros. Panichelli tresformó una pena máxima por mano de Rahim na área y al Real Oviedo tocába-y remontar. Sibo, Hassan, Cazorla y Paraschiv entraben al campu pa tratar de camudar les coses anque'l gol del empate nun llegaba. Seoane, con un bon disparu, tuvo l'empate pero Raúl atrapó bien el so llanzamientu. 

 

Yá na recta final del alcuentru, Alemão tuvo la más clara con un balón muertu na área, tres una mala salida de la meta del CD Mirandés, pero'l so remate estrellóse nel cuerpu d'un defensor. Los de Lisci tamién pudieron ampliar la so ventaya con un zapatazu de Reina a la cruceta. 

 

Pitíu final y derrota por 1-0 en Anduva que dexa a los nuesos con 50 puntos na tabla y cola mirada puesta yá nel próximu fin de selmana y el so duelu en casa énte l'Elche CF.