Ganes de Tartiere. Asina llegaba'l Real Oviedo a esta tercer xornada de LaLiga Hypermotion. Los carbayones víen les cares col Real Racing Club nel primer partíu de la temporada en casa para un conxuntu azul que quería sumar 7 de 9 nesti arranque ligueru. Tres l'empate collecháu en Castellón, Javi Caleja  modificó l'once y formó d'entamu con Aarón Escandell, Rahim, Costas, Dani Calvo, Oier Luengo, Cazorla, Del Moral, Sebas Moyano, Hassan, Chaira y Alemão.

L'alcuentru nun pudo empezar meyor para los intereses uvieinos y ye que nel minutu 11 los nuesos yá taben per delantre nel marcador. Ilyas Chaira, acabante aterrizar na capital asturiana, debutaba a lo grande y ponía pates arriba el municipal uvieín. L'estremu batió dende fora de la área a Ezkieta para poner el 1-0 nel lluminosu.

L'allegría azul nun duró enforma y Andrés Martín, nel 25' y en 26', dába-y la vuelta al choque con dos bonos goles. Xarru d'agua frío para l'uvieísmu que vía como la primer parte llegaba a la fin con resultancia adversa.

Tres la continuación, Javi Calleja introdució un triple cambéu para tratar de camudar les coses y metió a Colombatto, Dotor y Lucas. Nel minutu 50, Alemão tuvo l'empate con ocasión clara pero'l so remate cola maniega foi esviáu a córner por un defensor. Siete minutos más tarde, Arana tuvo'l retruque con un remate dende la frontera que se coló llixeramente percima de la meta defendida por Escandell.

Masca y Paulino entraben al campu para tratar de camudar les coses anque la moneda cayó pal llau racinguista. Michelin, nel 75´, sentenció'l choque con un bon gol dende la frontera que terminó per refugar toles esperances carbayonos. 1-3 y puntu final para un Real Oviedo que lo intentó hasta'l final con aproximamientos de Alemão y Colombatto.

Agora, tiempu para resetear y empezar a preparar el próximu alcuentru de Lliga Hypermotion énte'l Real Sporting de Xixón nel derbi asturianu.