El Carlos Tartiere acoyó esti domingu una nueva xornada de LaLiga Hypermotion na que'l Real Oviedo midióse al FC Cartajena. Coles mires de volver sumar de trés y brindar a tol uvieísmu del primer trunfu del cursu en casa, Javi Calleja introdució dellos cambeos nel once y formó d'entamu con: Aarón Escandell, Rahim, Dani Calvo, Oier Luengo, Lemos, Sibo, Colombatto, Cazorla, Hassan, Chaira y Alemão.

 

Dominiu azul. Asina podríen resumise los primeres 45 minutos nel municipal uvieín. El conxuntu carbayón salió con personalidá y autoridá al terrén de xuegu pa tratar de zarrar nel so propiu campu al Cartaxena. Cuando apenes se devasara'l minutu 10 d'alcuentru, Cazorla, con un llanzamientu de falta per debaxo de la barrera, a puntu tuvo de poner el primeru. Sicasí, el so llibre directu colóse raspiando'l poste derechu de la meta defendida por Pablo Cunat.

 

L'Oviedo siguía tratando d'entrar per banda gracies a les acciones individuales de Chaira y Hassan anque la ocasión más clara sería a balón paráu. Una gran intervención de la meta visitante evitó'l 1-0 tres un bon testerazu de Oier a centru de Colombatto. Tres esa acción nel 30', l'equipu d'Abelardo trató d'amenaciar la meta carbayona a la contra anque Escandell y la zaga carbayona arreglaron ensin problemes los ataques murcianos. Descansu.

 

Tres el pasu por vestuarios, y dempués d'un primer avisu de Cazorla, Javi Calleja introdució un doble camudo con Paraschiv y Sebas Moyano. Los nuesos nun cesaron en busca del primer tantu, que terminara per decantar la balanza, anque habría qu'esperar. Seone y Paulino de la Fuente tamién entraron al campu nel 73´ pero nun sería hasta'l 82´ cuando Colombatto fixo españar de felicidá a tol uvieísmu. Una triangulación en cantu de l'área terminó con un bon pase tras de Sebas que nun perdonó l'arxentín p'anotar el primeru. 1-0 y un gol que facía xusticia a lo visto sobro'l terrén de xuegu.

 

Con esta victoria'l Real Oviedo llogra los primeres trés puntos de la temporada nel Carlos Tartiere y torna a la sienda de la victoria. Agora, y con siete puntos nel so casilleru, el combináu azul yá piensa nel so próximu compromisu ligueru que va ser énte'l CD Eldense.