L'entrenador del Real Oviedo, Julián Calero, valoró la victoria del conxuntu azul ante l'Albacete na rueda de prensa posterior al alcuentru. El míster quixo poner el focu na capacidá competitiva del so equipu, especialmente dempués d'una selmana marcada poles llesiones y les baxes, y subrayó la importancia d'un trunfu que permite al conxuntu oviedista recuperar sensaciones y sumar tres puntos mui necesarios.

"Quiero dar la enhorabona a los mios xugadores porque veníemos d'una situación complicada de puntos y llesiones", señaló'l técnicu en primer llugar. Calero reconoció que l'alcuentru nun foi brillante en toles sos fases, daqué que, al so xuiciu, entraba dientro de lo esperáu daes les circunstancies de dambos equipos. "Por fases l'equipu tuvo meyor y n'otres regular, inclusive en zones onde nun me presta que estemos", esplicó.

Pa l'entrenador azul, por riba de tolo demás tuvo la manera na que los sos futbolistes afrontaron el partíu. "Va por delantre la forma de competir de los guajes y cómo defendimos. Debemos facer más, pero estes victories asienten el proyectu", afirmó.

Preguntáu por aquello col que se quedaba dempués del alcuentru, el madrilanu destacó la capacidá del equipu pa sacar alantre un partíu condicionáu poles circunstancies. "Si me apures, tuvimos meyor otros díes que güei. Pero a vegaes trata d'esto: los equipos bonos compiten bien y saben adaptase a les circunstancies. Adaptámonos", destacó.

El técnicu detalló que ún de los oxetivos yera caltener l'equipu alloñáu de la so propia portería, daqué que se llogró mientres bona parte del alcuentru. "La nuesa idea yera tar llueñe de la portería, l'hemos llográu a vegaes. Salvo al final, cuando se nos echaron enriba", apuntó.

Sobre'l cambiu introducíu tres el descansu, cola entrada de cuatro medios pa intentar ganar presencia con balón. "Queríemos más posesión, metí cuatro medios na segunda parte pa intentar tener la pelota. Pero a vegaes la necesidá apreta y decides protexer lo que tienes", indicó.

La importancia del trunfu tamién se reflexó nel apartáu anímicu. Calero consideró que la victoria supón un impulsu pal vestiariu y pa tol entornu oviedista, especialmente pa los afeccionaos que acompañaron al equipu hasta Albacete.

"Esta victoria ye bien importante nel anímicu. Que naide dexare de creer", afirmó. L'entrenador pidió, eso sí, caltener la perspectiva y afrontar tanto les victories como les derrotes con equilibriu: "Nun faremos fiesta por ganar, pero tampoco funerales nes derrotes".

"Pa l'entornu ye bonu y pa la xente que vino. Pa ellos tener una vuelta feliz ye importante. Que disfruten de la so victoria, pa l'entornu ye un bálsamu", concluyó.