Carlos Domínguez atendió a los medios de comunicación en El Requexón y comentó el trunfu del equipu a domicíliu, el so regresu a la competición y les sensaciones del grupu nesti entamu de temporada.

El defensa amosóse satisfechu por un trunfu importante pal equipu: “Esta victoria ye de les que mos da confianza pa los partíos na casa, que siempre son bonos y vienen bien nel anímicu”. Nel planu personal, destacó les sos bones sensaciones: “Tóime contentu. Tenía ganes de xugar yá y pudimos consiguir los tres puntos”.

Carlos tamién punxo’l focu nel trabayu de la plantiya: “Son rivales distintos. Nun tien nada que ver enfrentase al Granada, Leganés o Albacete. Trabayamos siempre pensando en nós. El equipu tuvo consistente na defensa y, a partir d’ehí, fuimos a crear xuegu. Tenemos que xugar al nuesu”.

De cara a la competición, el gallegu destacó la importancia de caltener la portería a cero y el trabayu defensivu que-yos pide’l cuerpu técnicu: “Trabayes siempre pa dir a ganar el partíu. Si nun encaixes ye muncho más fácil. El míster insístenos muncho en defender bien. Arriba tenemos coses pa xugar bien”.

Sobre’l próximu compromisu ante’l Burgos, Carlos señaló: “Cualquier equipu tien les sos armes. Ye una categoría difícil y vamos dir a ganar al Burgos”.

Por último, quiso destacar el sofitu de la afición: “El Tartiere ye increíble y la afición tamién. Nesti desplazamientu notóse”.

Con namái tres xornaes disputaes y munchos xugadores nuevos na plantiya, considera que’l equipu entá tien marxe pa siguir medrando: “Tamos na xornada 3. Munches persones nueves y tenemos que entendemos. Ye una victoria que da confianza”.