El defensa del Real Oviedo, Eric Bailly, compareció esti miércoles na sala de prensa d'El Requexón pa analizar l'actualidá del conxuntu azul enantes del alcuentru del próximu domingu frente al Getafe CF nel Carlos Tartiere.

El central oviedista reconoció'l momentu complicáu que traviesa l'equipu tres los últimos resultaos, anque insistió na importancia de siguir compitiendo hasta'l final. “L'equipu bien nun pue tar dempués de los dos últimos partíos. Había esperanza de ganar al Elche y al Betis pa siguir ehí, nun pudo ser. Namás queda intentar dar una bona imaxe. Intentar ganar al Getafe y dar una alegría a la xente”, señaló.

Na mesma llinia, Bailly aseguró que'l vestiariu caltién l'ambición de lluchar mientres esistan opciones matemátiques. “Hasta l'últimu partíu que tengamos opciones hai que lluchalu, anque sían bien poques. Namás quiero pensar en nós, en intentar acabar bien la temporada y ganar al Getafe”, esplicó.

El defensa azul tamién analizó la evolución del equipu a lo llargo del cursu y lamentó nun haber podido caltener la regularidá amosada en dellos alcuentros. “LaLiga ye un campeonatu bien difícil. Hubo un momentu nel que tuvimos bien, ganando fuera de casa. Ente'l Villarreal fiximos un bon partíu y tuvimos opciones de ganar, pero dempués nun pudimos ente l'Elche”, comentó.

Nel planu personal, Bailly afirmó sentise cómode en Uviéu y satisfechu col so rendimientu esta temporada. “Siento-me bien en Uviéu. Nel personal toi bien contentu, físicamente atópome bien y he tenido continuidá”, indicó.

Amás, l'internacional costamarfilanu faló sobre la posibilidá de disputar el próximu Mundial cola so seleición. “Tolos xugadores suañen con xugar un Mundial col so país. Tengo contautu cola federación y namás pueo intentar dar lo meyor de mí nos partíos que queden”, concluyó.