Zuebieta acoyó esta tarde una xornada nueva de competición oficial nel Grupu II de Segunda B, na que'l Real Uviéu Vetusta y la Real Sociedad B viéronse les cares.
El filial carbayón visitó Zubieta sabedor de la importancia de sumar los trés puntos pa nun se descolgar de los puestos altos de la tabla y refrendar el trabayu que, selmana a selmana, vien realizando. La primer parte, que foi de dominiu alternu con delles ocasiones pa los de Javi Rozada, resolvióse del llau de los locales, qu'aprovecharon un centru al área pa rematar y poner el balón no fondero de la rede. Depués del tantu de la Real Sociedad B, el filial azul siguió intentándolo, ensin atopase cola suerte de cara. Col resultáu de 1-0 llegóse a la final de los primeros 45 minutos. Na continuación, los carbayones salieron meyor, más enchufaos, buscando asociase pel mediu del prau y aprovechar la efectividá de los delanteros. Nel minutu 77 llegaron los minutos de llocura del partíu. De primeres, el colexáu espulsó a Lobato. Depués, l'árbitru señaló penalti por una cayida d'Ernesto n'área rival, que Lolo mandó al fondu de la rede. Un minutu más tarde, Borja marcó'l gol del partíu, depués d'executar un tiru dende'l mediu del campu que'l porteru local nun foi quién a atayar. Y, p'acabar, nel minutu 79, Lolo diba anotar el segundu de la so cuenta particular, con un remate n'área pequeña. Col 1-3 en marcador, anque tuviere ún menos, el Real Uviéu nun dexó de buscar la portería rival, pero recibió'l tantu final del alcuentru por parte de los locales.
El Real Uviéu Vetusta suma otra victoria más, ponse cuartu na tabla y la xornada que vien recibe al Mirandés n'El Requexón.
