El Carlos Tartiere foi l'escenariu del alcuentru qu'enfrentó al Real OviedoVetusta y al Sporting B y qu'acabó col resultáu de 2-0 a favor de los intereses oviedistas.
Los azules, qu'encaraben la xornada aplazada del pasáu mes de xineru, fueron dominadores claros del xuegu y les aiciones de peligru nos noventa minutos de xuegu. Na primer parte, que principió col gol de Lucas a los seis minutos de partíu, el filial carbayón fizo, con ésitu, el so xuegu asociativu, nel que Jimmy y Edu Cortina dirixeron la nave carbayona y aprovecharon la movilidá de los homes d'arriba pa crear numberoses aiciones de peligru. Na segunda metá, de color azul tamién, los de Javi Rozada siguieron igual que nos 45 primeros minutos y tuvieron delles ocasiones p'aumentar el marcador. Nel minutu 74, Ugarte fizo'l segundu pa los intereses oviedistas en rematando de cabeza un córner dende la derecha. Col resultáu de 2-0 llegóse a la fin del alcuentru.
El Real Oviedo Vetusta suma tres puntos más, asitiándose a cinco de los play off d'ascensu, y nun va tener descansu esta selmana, por recibir esti domingu en casa al Amorebieta.
