Hores depués de la fundación del Real Uviéu’l 26 de marzu de 1926, nel diariu La Voz de Asturias, el mesmu periódicu acuñaba nes sos páxines el lema “Uviéu por too y primero de
too”.
Depués d’años de gran rivalidá ente’l Real Stadium Club Ovetense y el Real Club Deportivo d’Uviéu, la fusión ente dambes entidaes favorecía la nacencia del Real Uviéu. A otru día de que se firmare l’acta fundacional de la entidá na sede de La Voz de Asturias, que s’atopaba na cai uviedina de Gil de Jaz, el diariu daba anuncia de la nacencia del club nun artículu que remataba d’esta manera:
“A trabayar, entós, bien auníos, compenetraos perfectamente y dexando nel requexu del escaecimientu coses que polo mesmo que foron yá nun son nin tienen que volver. Uviéu por too y primero de too: esi tien que ser d’equí p’arriba’l nuestru lema.”
Dende entós, llogremos ascensos y sufriemos descensos, fomos el primer equipu asturianu que xubió a Primera y el que tuvo a menos puntos de ganar la Lliga. Disfrutemos del meyor goliador español de tolos tiempos, según la Federación Internacional d’Historia y Estadística de Fútbol (IFFHS, sigles n’inglés), Isidro Lángara, que caltién vixentes entá güei dellos récords, como’l meyor promediu goliador en Primer División, mayor númberu de goles nun partíu oficial de la selección española y mayor númberu de hat-tricks en partíos siguíos en Primera, ente otres marques.
Supiemos aguantar delles calamidaes deportives y económiques, sobre manera a primeros del sieglu XXI, pa salir reforzaos d’elles, de la mano de decenes de miles d’aficionaos de tol mundu y del Grupo Carso, y volver poner proba a la máxima categoría del fútbol español.
Dende 1926, un total de 854 xugadores defendió en partíu oficial la camiseta del Real Uviéu hasta’l día de güei. Infinidá d’aficionaos de cinco xeneraciones sofitaron el club y tresviviéronse por él con una fidelidá única.
Más de 40 000 accionistes espardíos per más de 125 países profesen con arguyu l’uviedismu y convierten a lo llargo de tol añu’l Carlos Tartiere en destín de pelegrinaxe.
Esos son los nuestros poderes y fáennos inquebrantables, porque dende va xustamente 92 años defendemos y queremos al Real Uviéu por too y primero de too.
