Coles ausencies d’Aarón y Carlos Hernández, pero con Forlín, Mossa y Christian Fdez. de vuelta, el Real Uviéu d’Anquela presentó un únicu cambéu en comparanza col once titular davezu, entrando Yeboah en banda derecha, nun Estadi Municipal de Reus que siempre ye complicáu pa los equipos visitantes.
La primer parte foi complicada pa un Real Uviéu que nun yera quién a crear demasiáu peligru, y defendíase bien énte’l conxuntu catalán. El primer avisu llegó de botes de Saúl Berjón, con un disparu cruciáu nos primeros segundos de partíu, que marchaba esviáu. Linares atopóse con Edgar Badía nel siguiente remate, y un centru xu de Mossa dende la esquierda acabó tamién nes manes del meta local. Verdés remataba de cabeza esviao, en xugada a balón paráu, y el Reus buscaba siempre balones en llargo a les sos puntes, pero con una defensa del Real Uviéu que se defendió bien en tou momentu, anque ensin demasiáu control del balón hasta’l descansu.
Na segunda ameyoró’l papel del conxuntu uviedista, y tamién la so creatividá n’ataque. La más clara llegó en botes de Linares, que remató dos veces siguíes y atopóse con dos paraes de Badía. Otra vez, na siguiente xugada, a pase de Mossa que llantaba al ariete solu énte’l meta local, Badía atayó’l remate del capitán uviedista evitando’l gol. Poco más tuvo’l Real Uviéu, amás de dalgún remate lloñe y en xugada a balón paráu, pero ensin pasar demasiaos apuros en defensa.
A la fin, un empate que dexa al Real Uviéu sumar un puntu más na clasificación.
