El Real Uviéu precisaba ganar, y fíxolo. Nuna tarde na que l’equipu volvió paecese, en garra y intensidá, al equipu al que’l Tartiere aveza a ver ganar. Munchu más peligru n’ataque, portería a cero, y principalmente trés puntos vitales que lu caltienen na engarradiella polos puestos de play off d’ascensu.
Con dos cambeos nel once en comparanza col de la fin de selmana pasada en Soria, Anquela dio-y entrada a Linares en punta en cuenta de Toché y Fabbrini en cuenta d’Aarón. Costó-y al Real Uviéu crear peligru nos primeros minutos, pero’l primer averamientu foi de Saúl Berjón en forma de disparu dende la esquierda, qu’atayó’l meta del conxuntu murcianu. Pina resultaba esplusáu a la media hora de partíu por valtar a Johannesson en contra clara, y poco depués Linares anotaba’l primer gol del partíu, poniendo per delantre al Real Uviéu en marcador. Un centru de Saúl, dende la esquierda, raspiábalu Forlín y remataba Linares, de llombu a portería, dientro del área pequeña. Poques ocasiones clares tuvo yá’l Real Uviéu hasta’l descansu.
Na segunda, el conxuntu uviedista asediaba nos primeros minutos la meta del Lorca, pero ensin atopar premiu. Con tol peligru entornáu en banda esquierda, Johannesson remató forciáu un centru de Mossa qu’aparó’l meta del conxuntu lorquí. Fabbrini forció tamién un córner, tres d’un remate que tornó l’equipu visitante, y Saúl fusilaba dende la esquierda, pero volvía aparar Torgnascioli. Rocha probó suerte con un refugue, que remató dende la frontal del área, pero marchó raspiando’l llargueru. Diba llegar entós el segundu del capitán uviedista, que remataba de cabeza nel segundu palu, un centru de Mossa dende la raya de fondu, nel segundu y definitivu gol uviedista.
Los trés puntos quedaron nel Tartiere pa siguir lluchando polos puestos de play off d’ascensu, a partir del martes, con vuelta al trabayu a les 10:30 hores n’El Requexón.
