El Real Uviéu llegó a un alcuerdu pa la contratación de Juan Antonio Anquela como entrenador nuevu del primer equipu. El técnicu xienense comprométese cola entidá uviedista pa una temporada.
Juan Antonio Anquela, de 59 años d’edá, nació’l 11 de setiembre en 1957 en Linares, Xaén. El técnicu, que llega procedente de la SD Huesca, cola que xugó play off d’ascensu a Primer División, ye un gran conocedor del fútbol español, onde axunta una esperiencia dilatada y resultaos contrastaos. Anquela empezó la carrera como técnicu nel Real Xaén, siendo parte de dos ascensos del club a Segunda División dientro de seis play offs d’ascensu. Depués d’un pasu pela SD Huesca, onde llogró la salvación del conxuntu oscense en Segunda División B, ocupó los bancos d’UD Melilla y Águilas CF, pa dar el saltu a l’AD Alcorcón nuna de les sos meyores etapes como técnicu. Foi en febreru del 2008, encabezando la recuperación del conxuntu madrilanu, que travesaba un momentu delicáu. Llogró la permanencia, y na siguiente temporada protagonizó una gran eliminatoria de Copa del Rei énte’l Real Madrid, eliminando al conxuntu blancu depués d’una goliada y algamando los octavos de final nesa competición. Na mesma temporada, anque yá nel 2009, Anquela firmaba l’ascensu a Segunda División de l’AD Alcorcón pela primer vez na so historia. La siguiente campaña llogró de sobra la permanencia, pa clasificase na 2011-2012 pa los play offs d’ascensu a Primer División. L’equipu d’Anquela cayó elimináu n’última ronda énte’l Real Valladolid.
El siguiente pasu na carrera del técnicu xienense foi’l bancu del Granada, en Primer División, pa firmar pol CD Numancia nel 2013, onde permaneció hasta’l 2015 con dos salvaciones cómodes.
Juan Antonio Anquela llega al Real Uviéu depués de clasificar a la SD Huesca en sesta posición y xugar la primer ronda de play off. Nos díes vinientes va anunciase’l restu del cuerpu técnicu que va acompañar a Anquela nesta temporada nueva al frente del conxuntu uviedista.
El técnicu xienense va presentase’l llunes que vien, a les 12:00 hores, nel Carlos Tartiere. Hasta esi momentu, el técnicu nun va facer nengún tipu de declaración.
