Arturo Elías Ayub concedió una entrevista a les canales oficiales del Real Uviéu onde repasa la situación actual del club no económico, amuésase “más ilusionáu que nunca” nesti empiezu de temporada, esplícanos les novedaes importantes na ampliación de capital na que s’atopa metíu’l club; les sos sensaciones sobre’l técnicu nuevu y la plantiya, y tamién sobre la llegada d’un patrocinador principal nuevu. L’oxetivu, recuerda Arturo Elías, “ye tar nel play off y llograr l’ascensu”.
De siguío, la entrevista íntegra con Arturo Elías Ayub, representante máximu del Grupo Carso, accionista de referencia del Real Uviéu.
¿Ilusionáu col Real Uviéu d’esta temporada nueva?
Col Real Uviéu siempre toi ilusionáu, esta temporada más que nunca. Con muncha ilusión y munches ganes d’agora sí por fin cumplir l’oxetivu. Xusto se cumplen agora los plazos que punxemos dende la primer vez que fui pa llograr la llocura que sería pasar de Segunda B a Primer División, y quién me diere que se llogre. Con muncha ilusión de que seya asina.
¿Qué te tresmite Juan Antonio Anquela?
Tresmíteme muncha seguranza y esperiencia. Foi un determín malu de tomar, y espero que fore’l correctu. Polo que siento hasta’l momentu, yo paezme que sí. Y tal como falé con Anquela, esto ye de resultaos. De puntos, de númberos, de llograr metes. Vamos esperar a ver qué pasa. Hasta’l momentu, bien contentos, bien tranquilos.
Ye importante esplicar el tope salarial que tuvo’l club a la hora de volver iguar la plantiya esta temporada, y que va directamente xuníu a los ingresos por campaña d’abonaos, publicidá, etc., y tamién ampliaciones de capital. Gracies al esfuerciu de Carso, foise quién a ampliar la cifra marcada de mano. ¿Tas contentu?
Toi contentu col equipu que s’iguó. Dientro d’esi presupuestu y esos topes que nos punxeron, fixemos maravíes. Llográronse coses bien bones, xugadores importantes. Camudemos cuasi la metá de la plantiya anguaño. Llográronse coses bien importantes con un presupuestu limitáu; hai equipos como’l próximu rival que tienen el doble de presupuestu; sicasí, nós tenemos el doble de corazón. Por eso me paez que llogremos un bon equipu, que trai la camiseta perbién puesta y que lo va a dar too na cancha.
Lo que dexó claro la xestión de Carso dende’l principiu ye la norma de cero endeudamientu, y liquidación de deuda, con un 77 % yá liquidáu y más de doce millones d’inversión. Hai una ampliación en marcha qu’acaba’l 6 d’ochobre. ¿Qué podemos cuntar d’inversores nuevos que lleguen de la vuestra mano? ¿Qué cantidá calcules que pueda cubrise?
Eso ye daqué bien importante. Siempre prometí una alministración honesta y cuidadosa, que nun nos lleve a onde lleguemos a tar naquellos tiempos nos que’l club taba en riesgu de desapaecer, y xusto eso ye lo que tamos faciendo. De 15,4 millones de deuda, el fluxu de la operación yera de dos millones negativo, y esa deuda diba dir medrando. Güei tamos en 3,5 millones de deuda; tenemos una xestión que nun da beneficiu, pero nun pierde dineru; tenemos un club sanu. Llogremos grandes coses na parte económica, y con una ampliación de capital que nos va dexar acabar de pagar el total de la deuda y que’l club quede saniáu dafechu. Esti aumentu nuevu de capital vien de dos tipos d’inversionistes; un inversionista mexicanu d’ascendencia asturiana, don Antonio Cosío, al que-y lo agradezo muncho porque lo fai de corazón, polos sos raigaños, pol so Uviéu, porque dende bien neñu él ye aficionáu del Real Uviéu. Y otru grupu bien interesante: un grupu d’inversionistes norteamericanos, d’EE. UU, onde se formó un grupu ente dalgunos de los inversionistes más importantes d’EE. UU., de tolos negocios. Tenemos un grupu de socios que me siento bien arguyosu de tener, porque son de super primer nivel. Siempre los tuviemos de primer nivel, pero esti grupu ye un soporte pal club perimportante.
¿Polo tanto namás faltaría acabar de liquidar la deuda pa que’l club fore autosuficiente dafechu?
Ente esti añu y el que vien tendríemos que tener cero delda. Siempre prometí un proyectu responsable: ta ende. Vamos tener un club sanu económicamente y agora falten los resultaos deportivos. Enantes apuntaba los topes de LaLiga pa iguar la plantiya, tratemos de facer un trabayu cuasi máxicu colo que teníemos, pero sí ye verdá qu’hai diferencies bien grandes con otros equipos poles normes estipulaes en LaLiga. Los equipos baxaos de primera tienen el doble o más de presupuestu que nós, y competir asina ye perdifícil. Por eso la forma que nós tenemos de competir d’esta manera ye llogrando más abonos vendíos n’estadiu, más ingresos por publicidá, y ehí tengo otra bona noticia. Esta selmana anunciamos un patrocinador nuevu, una marca mundial que se va ver bien guapa nel pechu de la camiseta; esta mesma selmana anunciámoslo. Tamos a puntu de zarralo. Pero sí ye bien importante la venta d’abonos n’estadiu porque suma directamente pa tener un bon presupuestu, tener meyores xugadores, etc. Por eso pído-y a la xente’l so granu d’arena, que nos dea un emburrión colos abonos, porque tamos retrasaos en comparanza con otros años, y quién me diere que llogremos una meta más alta que temporaes anteriores.
Munches bones noticies, Arturo. ¿Cuála foi la clave pa llogralo?
La clave pa llograr coses bones ye un bon equipu de trabayu. Nun puedo tar más satisfechu y más contentu col presidente. Amás de que me tien informáu minutu a minutu de los partíos, cuasi tolos díes per wasap, falamos per teléfonu. El trabayu que ta faciendo’l presidente, el Conseyu d’Alministración, caún d’ustedes, Joaquín del Olmo... cada cual na so trinchera, ye lo que ta llogrando los resultaos. Toi mui agradecíu tanto pol presi como por caúna de les persones que formen l’equipu de trabayu del club. Eso ye lo que nos ta dando los resultaos, y eso ye lo que nos va llevar al ascensu.
La pregunta que más se repite a lo llargo de la temporada. ¿L’oxetivu d’esta temporada ye l’ascensu?
L’oxetivu dende’l primer añu que’l Grupo Carso entró foi l’ascensu, dende onde teamos. Llograr de Segunda B a Segunda División. Tuviemos un primer añu en Segunda de media tabla, que paezme que pa ún acabante xubir nun ye malo, ensin qu’eso suponga conformame. Un segundu añu raspiando’l play off, y lo que nun podemos ye mirar p’atrás, nin pa garrar impulsu. Güei quédanos namás, polo menos, tar nel play off y verdaderamente, ensin nenguna dulda, buscar l’ascensu.
Siguiendo colo deportivo, tamos viendo muncha presencia y importante de canteranos nel primer equipu. Fíxose una plantiya curtia pa poder da-y presencia a esa cantera que dende’l principiu foi prioridá pa Carso, pero qu’hai que da-y la paciencia necesaria y los tiempos pa que dea los frutos. ¿A futuru qu’importancia crees que va tener nel proyectu?
De casualidá taba xugando ayeri en YouTube, y atopéme cola primer entrevista que di’l día que llegué a Uviéu pela primer vez. Dicía cuáles yeren les prioridaes del proyectu nel club, y la segunda que nomaba yeren les fuercies básiques. Ye l’oxetivu más al llargu plazu porque se tien que dir formando col tiempu, pero toi bien bien contentu porque hai cinco o seis rapazos que tuvieron col primer equipu, dos o trés que tán cuasi siempre, y toi bien contentu de qu’esi plan que teníemos va cinco años güei se tea cumpliendo, siendo ún de los oxetivos que trazamos, y otra vez más ún de los oxetivos que se tán cumpliendo.
¿Vas ver el derby el sábadu?
Nun se cómo lo voi facer, pero si non voi mandar un dron hasta allá pa velu, porque nun voi perder esti partíu. Ye un partíu bien importante, paezme qu’estes dos grandes aficiones esperen un derby, y de los dos llaos tamos bien entusiasmaos en tenelu. Lo único que-y pido a l’afición ye que lo disfrute, lo respete cuidadosamente, y tengamos lo que ye: una gran fiesta del fútbol. Cola rivalidá qu’hai, pero qu’esa rivalidá permaneza na cancha. ¡Y que gane’l Real Uviéu!
La xente tien gana de vete equí...
Bien de ganes tengo yo tamién. Esti branu tuvi que dir a otros sitios, pero pal derby cuando se xuegue nel Tartiere, voi tar seguro pellí.
Son munches y perbones noticies, Arturo.
Los oxetivos tán cumpliéndose. La posición financiera sana que tien el club; los oxetivos deportivos que foron medrando y a meyor cada añu; la parte de la cantera que ta dando los resultaos que queríemos; un patrocinador nuevu y accionistes nuevos, con aumentu de capital, con inversionistas nuevos perimportantes. Tócame esta entrevista en bon momentu, porque amás del gran trés a cero d’ayeri, tenemos perbones noticies que son toles que mentemos y puedo da-yos güei.
Munches gracies, Arturo.
Gracies a ustedes y un saludu.
