El camín sigue y lo meyor ta por llegar

El Real Oviedo ganó por 2-1 al Cádiz CF y remata en tercer posición. El trunfu del Elche CF al Deportivu de la Coruña por 0-4 evitó cualquier opción d'ascensu directu del cuadru uvieín que lluchó hasta'l final y sacó adelantre'l so alcuentru. Agora, tiempu pa pensar nel Almería, que va ser el rival de los nuesos na primera eliminatoria. 

 

Paraschiv y De la Foz fueron les principales novedaes nel once de Paunovic. Conscientes de lo qu'había en xuegu, el Real Oviedo salió con un puntito más y nun dexó de someter al so rival dende'l pitíu inicial. La insistencia carbayona tuvo'l premiu del gol con un espectacular remate de Seoane dende la frontera énte'l que nada pudo facer Aznar.

 

Diakite, nel minutu 31´, punxo les tables con otru golazu pero l'Oviedo nun camudó. Les llegaes por dambes bandes yeren constantes y nel minutu 40, Nacho Vidal marcó un golazu espectacular pa volver poner per delantre a los locales. Na segunda metá, Cardero, Pomares, y Paulino dieron descansu col pasu de los minutos a Rahim, Colombatto y Hassan. 

 

El terceru y definitivu pudo llegar anque'l tramu final del choque tuvo marcáu por un posible penalti a favor del Cádiz que caltuvo en silenciu al uvieísmu yá que l'empate baxaba un puestu a la clasificación al equipu. Finalmente, el colexau indicó que nun había nada y pitó el final del partíu que fai que l'Oviedo mídase al Almería el próximu sábadu a les 21:00 hores.

 

Tres el pitíu final, el Tartiere despidió a los suyos con aplausos y ovaciones. Amás, Santi Cazorla afaló a la grada lleendo una carta emotiva ya ilusionante de cara a lo que ta por venir. "Gracies, oviedistas. El camín sigue. Y lo meyor ta por llegar. ¡Vamos, Oviedo!", concluyó'l capitán.